पेझारी येथे भाजपच्या वतीने विद्यार्थ्यांचा गुणगौरव
पोयनाड (बातमीदार) : अलिबाग तालुक्यातील पेझारी येथे भारतीय जनता पार्टी महिला मोर्चा व भारतीय जनता युवा मोर्चा अलिबाग तालुका यांच्या वतीने इयत्ता १० वी व इयत्ता १२ वी तसेच शिष्यवृत्ती परीक्षेत उत्तीर्ण झालेल्या गुणवंत विद्यार्थ्यांचा सोहळा नुकताच उत्‍साहात पार पडला. या कार्यक्रमात पोयनाड पंचक्रोशीतील विद्यार्थ्यांचा प्रमाणपत्र व भेटवस्तू देऊन गुणगौरव करण्यात आला. इयत्ता १० वी व १२ वी नंतरच्या पुढील शैक्षणिक वाटचालीसंदर्भात या वेळी विद्यार्थ्यांना मार्गदर्शन करण्यात आले. या माध्यमातून परिसरातील विद्यार्थ्यांच्या कर्तृत्वाला दाद देऊन त्यांच्यामध्ये नवचैतन्य निर्माण करण्याचा हा एक छोटासा प्रयत्न असल्याचे या वेळी विविध मान्यवरांनी विद्यार्थ्यांना मार्गदर्शन करताना व्यक्त केले. या प्रसंगी भाजप महिला मोर्चा दक्षिण रायगड जिल्हाध्यक्ष चित्रा पाटील, भाजप नेते आस्वाद पाटील, मंजुषा कुंद्रीमोती, भाजप दक्षिण रायगड उपाध्यक्ष सवाई पाटील, सुमना पाटील, प्रियदर्शनी पाटील, चेतन पाटील, अशोक वारगे, रोशन भगत, कृष्णा जाधव, प्रीती पाटील, जयश्री समजीसस्कर, प्रिया पाटील, रुपाली म्हात्रे यांच्यासह मोठ्या संख्येने भाजपचे कार्यकर्ते व नागरिक, विद्यार्थ्यांचे पालक उपस्थित होते.
...............
पारंपरिक पोशाख परिधान करून महिलांनी केले नृत्य सादर
रोहा (बातमीदार) ः खासदार सुनील तटकरे यांच्या वाढदिवसानिमित्त रोहे तालुक्यातील वाशी ग्राम पंचायतीच्या वतीने कारिवणे येथे ठाकूर समाजातील महिलांसाठी पारंपरिक सांस्कृतिक कार्यक्रम व मुलींसाठी विविध स्पर्धांचे आयोजन करून समाजप्रबोधन व ग्राम एकतेचे उदाहरण घालून दिले. या कार्यक्रमाच्या निमित्ताने ग्रामस्थांचा विशेषतः महिला वर्गाचा उत्स्फूर्त प्रतिसाद लाभला. शुक्रवारी (ता.२५) रोजी पार पडलेल्या या कार्यक्रमात ठाकूरवाडी येथील महिलांनी पारंपरिक पोशाखात विविध नृत्य सादरीकरण केले. लहान मुलींसाठी घेतलेल्या स्पर्धांमध्ये बालकलाकारांनी आपले कौशल्य सादर केले. कार्यक्रमाला ग्रामस्थांसह महिला वर्गाचा उत्स्फूर्त प्रतिसाद लाभला. कार्यक्रमात उपस्थित राष्ट्रवादी काँग्रेसचे जिल्हा सरचिटणीस सुरेश मगर यांनी मार्गदर्शन केले. ते म्हणाले की, विकास ही एक सतत चालणारी प्रक्रिया असून मागील दोन वर्षात खासदार सुनील तटकरे यांच्या प्रयत्नांतून वाशी ग्राम पंचायतहद्दीत १६ ते १७ कोटी रुपयांचा निधी प्राप्त झाला आहे. या निधीच्या साहाय्याने आपल्या भागातील रस्ते, पाणी, वीज, शाळा अशा मूलभूत सुविधा मिळाल्या. येथील महिलांनी खासदार तटकरे यांच्या वाढदिवसाच्यानिमित्ताने एक अगळा वेगळा उपक्रम राबवून गावाला एकत्र आणले, ही कौतुकास्पद बाब आहे असे सुरेश मगर म्हणाले.
.........
अंनिसच्या वतीने कार्यकारिणी निवड मोहीम
पेण (बातमीदार) ः महाराष्ट्र अंधश्रद्धा निर्मूलन समिती रायगडमधील सर्व शाखांची कार्यकारिणी निवडणूक सुरू आहे. नुकतेच रोहा तालुक्याची कार्यकारिणी निवड जाहीर करण्यात आली. यावेळी अध्यक्षपदी डॉ. फरीद रहेमान, उपाध्यक्ष दत्तात्रय शेडगे, कार्याध्यक्ष नंदकुमार सचिव, दिनेश शिर्के, अनिकेत पाडत, प्रमोद खांडेकर, बुवाबाजी संघर्ष विभाग शुभांगी सावंत, महिला सहभागी विभाग दीपाली पोरे, वैज्ञानिक जाणीव प्रकल्प विभाग मुमताज मुलानी, सांस्कृतिक विभाग मारुती पाठक, वार्तापत्र विभाग अब्दुल महंमद, अनवा विवेक, वाहिनी विभाग बघेरा गोसाळकर अशाप्रकारे कार्यकारिणी निवडण्यात आली आहे. या वेळी निरीक्षक म्हणून जिल्हा अध्यक्ष विवेक सुपेकर, जिल्हा कार्याध्यक्ष मोहन भोईर, जिल्हा प्रधान सचिव संदेश गायकवाड आदी उपस्थित होते.
...................
खोपोलीतील वंदना माडपे यांचे निधन
खोपोली (बातमीदार) ः खोपोलीतील ज्येष्ठ रहिवाशी वंदना माडपे (वय ६४) यांचे निधन झाले आहे. खोपोलीतील ज्येष्ठ पत्रकार जयवंत माडपे यांच्या त्‍या पत्नी होत. खोपोली लौजी येथील वैकुंठ धाम येथे त्यांचा अंत्यविधी पार पडला. यावेळी लौजी ग्रामस्थ, शहरातील पत्रकार मंडळी, सामाजिक, शैक्षणिक व राजकीय क्षेत्रातील नागरिक मोठ्या संख्येने उपस्थित होते. त्यांच्या पश्चात एक मुलगी, दोन पुत्र व नातवंडे असा परिवार आहे.