आंबेवाडी येथील खड्ड्यांमुळे जीवघेणा प्रवास
महामार्गाच्या कामात संथगती; अपघाताची शक्यता वाढली
रोहा, ता. २६ (वार्ताहर) ः मुंबई-गोवा महामार्गावरील आंबेवाडी (कोलाड) येथील बाजारपेठेत, विशेषतः बँक ऑफ इंडियासमोरील भागात दीड ते दोन फूट खोल खड्डे पडले आहेत. त्यामुळे या ठिकाणी मोठ्या प्रमाणावर वाहतूक कोंडी होत आहे. वाहनचालकांना या खड्ड्यांमधून मार्ग काढताना जीव मुठीत धरावा लागत असून, अपघाताच्या घटना घडण्याची शक्यता अधिकच वाढली आहे.
दोन दिवसांपूर्वी एक मिनीडोअर वाहन खड्ड्यांमध्ये अडकल्याने पलटी होण्याच्या अवस्थेत होते. सुदैवाने मोठा अपघात टळला. येथे भविष्यात जीवितहानी होण्याची शक्यता नाकारता येत नाही. त्यामुळे संबंधित प्रशासनाने तातडीने हे खड्डे भरून तात्पुरती का होईना पण उपाययोजना करावी, अशी नागरिकांची मागणी आहे. मुंबई-गोवा महामार्गाच्या चौपदरीकरणाचे काम गेली १८ वर्षे सुरू असून, अद्याप अपूर्ण आहे. एक तप उलटून गेले तरी महामार्गाचा ‘वनवास’ संपलेला नाही. या दिरंगाईमुळे स्थानिक ग्रामस्थ, व्यावसायिक व प्रवासीवर्ग प्रचंड त्रस्त आहेत. महामार्गालगत असलेल्या तळवली, तिसे, वरसगाव, आंबेवाडी, गोवे, पुई, खांब, नागोठणे या गावांमध्ये रस्त्याची स्थिती अतिशय दयनीय झाली आहे. खड्ड्यांमध्ये पाणी साचून चिखल झाला आहे. त्‍यामुळे वाहनचालकांसह पादचाऱ्यांना मोठ्या अडचणींना सामोरे जावे लागत आहे. राज्य सरकारकडून कोट्यवधी रुपयांचा निधी मंजूर होऊनही रस्त्याचे काम संथगतीने सुरू आहे. या महामार्गासाठी अनेकांनी आपली जमीन, घरे, दुकाने, पोल्ट्री फार्म गमावले आहेत. रोजंदारीवर जगणाऱ्या मजुरांचाही उदरनिर्वाह बुडाला आहे. इतकी किंमत मोजूनही नागरिकांना अपूर्ण रस्त्याची धूळ खात जगावे लागत आहे. सुकेळी ते आंबेवाडी नाका या दरम्यान रस्त्याची अवस्था अधिकच बिकट आहे. अनेक ठिकाणी खड्ड्यांचे साम्राज्य पसरले असून, कोणतीही क्षणी मोठी दुर्घटना घडू शकते.
.................
कोट
आंबेवाडीतील बँक ऑफ इंडियासमोरील रस्‍त्‍यावर अनेक दिवसांपासून खड्डे पडले आहेत. त्‍यामुळे वाहनचालकांना नाहक त्रास सहन करावा लागत आहे. भविष्यात एखादा मोठा अपघात घडल्यास जबाबदार कोण असणार आहे?
- चंद्रकांत लोखंडे, उप तालुकाप्रमुख, शिवसेना (उबाठा)