केडीएमसीने नियम डावलून सुमित कंपनीला दिला ठेका
कचऱ्यात काळेबेरे नक्की कोणाचेः शिवसेना ठाकरे गटाने पत्रकार परिषदेत आरोप
सकाळ वृत्तसेवा
डोंबिवली, ता. २६ ः चेन्नई शहरातील स्वच्छता पॅटर्नच्या धर्तीवर विशेष स्वच्छता मोहिम राबवली जात आहे. पालिकेने मोठा गाजावाजा करत सुमित एल्कोप्लास्ट या कंपनीला कोट्यवधी रुपये खर्च करुन हे काम दिले. या खर्चाचा बोजा पालिकेने अतिरिक्त कर स्वरूपात नागरिकांवर लादला आहे. यातच आता कंपनी संचालक अमित साळुंखे याला दारू घोटाळ्याप्रकरणी झारखंडमध्ये अटक झाली आहे. केडीएमसीमध्ये देखील कचऱ्याचे कंत्राट मिळवण्यासाठी कंपनीने केलेला घोटाळा ठाकरे गटाचे जिल्हाप्रमुख दीपेश म्हात्रे यांनी समोर आणला आहे. कोणताही अनुभव नसताना कंपनीला हे कंत्राट दिले हे काळेबेरे नक्की कोणाचे, असा सवाल त्यांनी उपस्थित केला आहे.
अमित साळुंखे याला दारू घोटाळ्याप्रकरणी अटक होताच दीपेश म्हात्रे यांनी पत्रकार परिषद घेत कंपनीच्या बाबी उघडकीस आणल्या. यावेळी कल्याण जिल्हा संघटिका वैशाली दरेकर राणे, शहर प्रमुख प्रकाश तेलगोटे हे देखील उपस्थित होते.
दीपेश म्हात्रे म्हणाले, सुमित कंपनीमध्ये सुमित फॅसिलिटीज, सुमित एन्कोप्लास्ट कल्याण लिमिटेड, सुमित एन्व्हायरमेंट सिस्टम्स लिमिटेड या तीन कंपन्या सामील आहेत. या तिन्ही कंपन्यांना घनकचरा व्यवस्थापनाचा कोणताही अनुभव नाही. घनकचरा व्यवस्थापन आणि वाहतूक या कामासाठी दर वर्षाला ८५ कोटी रुपये ठेकेदाराला दिले जातात. पुढील दहा वर्षासाठी हा ठेका त्याला दिला आहे. हे पैसे देण्यासाठी सर्वच नागरिकांवर कर लादला आहे. ज्या प्रभागांमध्ये या कंपनीमार्फत काम केले जात नाही. त्या प्रभागातील नागरिकांवर देखील ही करवाढ लादण्यात आलेली आहे हे कितपत योग्य आहे, असा सवाल त्यांनी विचारला.
कामात दिरंगाई केल्याने या कंत्राटदाराला पहिल्या महिन्याचा बिल दिले नाही. पालिका आयुक्तांनी याची पूर्ण चौकशी करून या कंत्राटदाराचा ठेका तात्काळ रद्द करावा, अशी आमची मागणी आहे. अन्यथा याविरोधात उद्धव बाळासाहेब ठाकरे पक्षाच्या वतीने उच्च न्यायालयात जनहित याचिका दाखल करण्याचा इशारा जिल्हाप्रमुख म्हात्रे यांनी दिला.