उल्हासनगर, ता. २६ (वार्ताहर) : उल्हासनगरमधून रायता येथील फार्महाऊसवर गटारी साजरी करायला गेलेल्या दोन तरुणांना बेदम मारहाण करण्यात आली होती. या प्रकरणात शिवसेना युवासेना पदाधिकारी विक्की भुल्लर यांचे नाव चर्चेत आल्याने राजकीय वर्तुळातही चर्चांना उधाण आले. मात्र, या आरोपांना खुद्द भुल्लर यांनीच पीडित तरुणाच्या आई-बहिणीसह खुलासा देत जोरदार प्रतिउत्तर दिले आहे.
उल्हासनगर कॅम्प १ मधील संत रोहिदास नगरमधील मुकेश जाधव हे गुरुवारी गटारी पार्टी साजरी करण्यासाठी त्यांच्या मित्रमंडळींसह रायता येथील ‘आदित्य फार्महाऊस’ येथे गेले होते. त्याच वेळी मुकेशचा नातेवाईक करण जाधवही तेथे काही सहकाऱ्यांसह आला होता. पार्टीदरम्यान करण आणि मुकेश यांच्यात जुना वाद पुन्हा उफाळून आला. या वादाचे रूपांतर काही वेळातच मारहाणीत झाले. या झटापटीत करण आणि त्याचा मित्र शिवम गुप्ता हे गंभीर जखमी झाले. त्यांना तत्काळ कल्याण येथील एका खासगी रुग्णालयात दाखल केले. या घटनेनंतर करणने समाज माध्यमांवर एक व्हिडिओ शेअर करत शिवसेना युवा नेते विक्की भुल्लर व त्यांच्या सहकाऱ्यांवर मारहाण घडवून आणल्याचा गंभीर आरोप केला होता.
या घटनेनंतर भुल्लर यांनी पत्रकार परिषद घेत प्रत्युत्तर दिले आहे. पत्रकार परिषदेत करणची आई आणि बहीण उपस्थित होत्या. त्यांनीच भुल्लर यांचा या हाणामारीत काहीही संबंध नसल्याचे स्पष्ट केले. भुल्लर म्हणाले, माझ्यावर लावलेले सर्व आरोप खोटे आहेत. ही घटना संपूर्णपणे कौटुंबिक वादातून घडली आहे. माझा या प्रकरणाशी काहीही संबंध नाही. त्यांनी पोलिस प्रशासनाकडे या प्रकरणाची सखोल चौकशी करून खऱ्या दोषींवर कठोर कारवाई करण्याची मागणी केली आहे.

माझ्यावर लावलेले सर्व आरोप खोटे, निराधार आणि दिशाभूल करणारे आहेत. मी त्या फार्महाऊस पार्टीत उपस्थितही नव्हतो. करण जाधव याने वैयक्तिक वादातून माझे नाव यात ओढण्याचा प्रयत्न केला आहे. पीडिताची आई आणि बहीण यांना सोबत घेऊन स्पष्ट भूमिका मांडली आहे. पोलिसांनी योग्य चौकशी करून दोषींचा शोध घ्यावा.
- विकी भुल्लर, युवासेना, कल्याण लोकसभा सचिव