पनवेल, ता.२६ (बातमीदार)ः राज्य उत्पादन शुल्क विभागाने पनवेल ग्रामीण येथे पेंधरजवळ सापळा रचत एका चारचाकी तसेच खोलीमधून ११ लाख ८५ हजार ५९५ रुपयांचा मद्यसाठा हस्तगत केला आहे. या प्रकरणी तीन आरोपींना ताब्यात घेतले आहे.
राज्य उत्पादन शुल्क विभागाने पनवेल ग्रामीणच्या हद्दीतील तळोजा पोलिस स्टेशन परिसरात एका वजन काट्यासमोर पेंधर सापळा रचुन चारचाकी वाहनातील उच्च प्रतीच्या बनावट विदेशी मद्याच्या १७ बाटल्यांसह २ मोबाईल असा ५ लाख ४४,३३० रुपयांचा मुद्देमाल जप्त केला होता. या कारवाईनंतर पथकाने पेंधर येथील एका पत्र्याच्या खोलीतून बनावट विदेशी मद्याच्या ५४ बाटल्या, विदेशी मद्याच्या ४२ बाटल्या, रिकाम्या बाटल्या, बनावट झाकणे, बनावट कागदी लेबल असा ६ लाख ४१,२९५ रुपयांचा मुद्देमाल जप्त केला. या कारवाईत संतोष उरथ, बिजु उरथ, बिनु कल्लूर यांना अटक करण्यात आली आहे. त्यांच्यावर महाराष्ट्र दारूबंदी कायदा १९४९ अन्वये गुन्हा नोंदवण्यात आला आहे.
पावणेबारा लाखांचा मद्यसाठा जप्त