भिवंडी, ता. २६ (बातमीदार) : भिवंडी पोलिसांनी नुकतेच तीन वेगवेगळ्या भागात केलेल्या कारवाईत चार फरार गुन्हेगारांना अटक केली आहे. या कारवाईदरम्यान, पोलिसांनी त्यांच्या ताब्यातून तीन बेकायदा शस्त्रेही जप्त केली.
शांतीनगर पोलिसांनी अशोकनगर परिसरातून अब्दुल्ला मुनवर मोमीन याला शस्त्रासह अटक केली. तो प्रतिबंधित क्षेत्रात बेकायदा प्रवेश करताना आढळला. त्याच्यावर अनेक गंभीर गुन्हे दाखल आहेत. त्याचप्रमाणे, भोईवाडा पोलिसांनी ओसामा मेहबूब खान याला अटक केली असून, त्याच्याकडून देशी चाकू जप्त केला आहे. तो हद्दपारी आदेशाचे उल्लंघन करत परिसरात घुसला होता. नारपोली पोलिसांनी अनिल चव्हाण याला प्रतिबंधित क्षेत्रात फिरताना पकडले. त्याच्याकडेही घातक शस्त्र होते. दुसऱ्या घटनेत, विकास ऊर्फ शेंग्या मुनकुड धोत्रे यालाही हद्दपारीचे आदेश धाब्यावर बसवल्याप्रकरणी अटक करण्यात आली. त्याच्याकडूनही शस्त्र जप्त करण्यात आले. पोलिसांनी अशा गुन्हेगारांवर कडक नजर ठेवण्याचे सांगितले आहे.