१५ कोटी दस्तऐवज एका क्लिकवर
म्हाडाचा कारभार पारदर्शक

सकाळ वृत्तसेवा
मुंबई, ता. २६ ः म्हाडाचा कारभार आणखी पारदर्शक झाला असून वेगवेगळ्या प्रकारचा तब्बल १५ कोटी दस्तऐवज (कागदपत्रे) सर्वसामान्यांना पाहण्यासाठी उपलब्ध करून देण्यात आली आहेत. हे दस्तऐवज म्हाडाच्या संकेतस्थळावर उपलब्ध असून अधिकृतपणे नोंदणी करून हा दस्तऐवजाचा खजाना पाहता येणार आहे. दरम्यान, यामध्ये सुरक्षिततेसाठी सायबर सिक्युअर लेअर आणि सिक्युरिटी ऑडिटचा अवलंब करण्यात आल्याने एखाद्या व्यक्तीची खासगी माहिती मिळवता येणार नाही.

सर्वसामान्य नागरिकांना केंद्रस्थानी ठेवून म्हाडाकडून सातत्याने वेगवेगळ्या योजना, उपक्रम राबवले जातात. त्याचाच भाग म्हणून नागरिकांना सुलभ व सुरक्षितरीत्या माहिती उपलब्ध करून देण्याच्या उद्देशाने माहितीचा अधिकार अधिनियमांतर्गत माहितीच्या स्वयंप्रकटीकरणाद्वारे म्हाडाच्या https://mhada.gov.in या अधिकृत संकेतस्थळावर संबंधित सर्व विभागांचा वर्गवारीनुसार १५ कोटी दस्तऐवज (संवेदनशील वगळून) नागरिकांना केवळ पाहण्यासाठी ऑनलाइन उपलब्ध करून देण्यात आले आहे. म्हाडाचे उपाध्यक्ष संजीव जयस्वाल यांच्या निर्देशानुसार पारदर्शकतेच्या दिशेने म्हाडाने वाटचाल करीत आहे.

ही माहिती उपलब्ध
म्हाडाच्या विविध विभागांतील सूचना, निविदा, कार्यालयीन आदेश, कार्यालयीन टिप्पणी, प्रस्ताव मंजुरी यासारख्या दस्तऐवजांचा यामध्ये समावेश असून नागरिकांना हे दस्तऐवज म्हाडा संकेतस्थळावर एका क्लिकवर उपलब्ध होणार आहे. त्यामुळे माहितीच्या अधिकाराअंतर्गत अर्ज करण्याची आवश्यकतादेखील कमी होणार आहे. संकेतस्थळावरील माहिती ई प्रमाण वापरून प्रमाणित करण्यात आली असून सत्यापित व सुरक्षित आहे.

नोंदणी बंधनकारक
विविध दस्तऐवज पाहण्यासाठी म्हाडाच्या अधिकृत संकेतस्थळावर नागरिकांसाठी (Citizen Corner) या विभागातील विभागनिहाय अभिलेख (Department Wise Records) मध्ये जाऊन अर्जदाराने नोंदणी करणे आवश्‍यक आहे. त्यानंतरच विविध विभागांशी संबंधित दस्तऐवज नागरिकांना बघण्यासाठी उपलब्ध होतील; मात्र सुरक्षिततेच्या दृष्टीने कोणताही दस्तऐवज डाऊनलोड करता येणार नाही अथवा त्यांचे स्क्रीनशॉट घेता येणार नाहीत. दस्तऐवज पाहताना नागरिकांना कारण नमूद करणे बंधनकारक असणार आहे.