मुरबाड, ता. २६ (बातमीदार) : म्हसा ग्रामपंचायतीतील सात सदस्यांच्या राजीनाम्याप्रकरणी सोमवारी (ता. २८) ठाणे जिल्हा परिषदेचे मुख्य कार्यकारी अधिकारी यांच्याकडे सुनावणी होणार आहे.
३१ मे रोजी म्हसा ग्रामपंचायतीच्या मासिक सभेत नऊपैकी सात सदस्यांनी राजीनामा दिला होता. त्यानंतर २७ जूनच्या सभेतही राजीनाम्यावर सरपंच जया घागास यांनी कोणताही निर्णय घेतला नाही, असे सदस्यांचे म्हणणे आहे. या संदर्भातील तक्रार मुरबाड गटविकास अधिकाऱ्यांकडे पाठवण्यात आली होती. त्यांनी हे प्रकरण पुढे ठाणे जिल्हा परिषदेच्या मुख्य कार्यकारी अधिकाऱ्यांकडे सुनावणीसाठी पाठवले आहे.

निवडणूक लागण्याची शक्यता
तालुक्यातील म्हसा ग्रामपंचायतमध्ये नऊ सदस्य आहेत. सरपंच जया घागस यांनी आपल्या पदाचा राजीनामा द्यावा, अशी सदस्यांची इच्छा असल्याचे समजते. त्या राजीनामा देत नसल्यामुळे सात सदस्यांनी राजीनामे दिले आहेत, असे सांगितले जाते. राजीनामे मंजूर झाल्यास ग्रामपंचायत बरखास्त होईल आणि निवडणूक घ्यावी लागेल, अशी शक्यता वर्तविण्यात येत आहे.