वीज बिलापोटी राज्य सरकार महावितरणला देणार ३४१ कोटी

मुंबई : राज्य सरकारने कृषिपंपाला मोफत वीज देण्याचा निर्णय घेतला आहे. त्यानुसार महावितरणकडून शेतकऱ्यांच्या पंपाला अखंडित वीजपुरवठा केला जात आहे. त्याच्या वीजबिलापोटी राज्य सरकार महावितरणला तब्बल ३४१ कोटी रुपये देणार आहे. त्यामुळे महावितरणला एकरकमी निधी उपलब्ध होणार असल्याने अखंडित वीजपुरवठ्याला आणखी पाठबळ मिळणार आहे. महावितरणचे राज्यभरात सुमारे अडीच कोटी वीजग्राहक आहेत. त्यामध्ये सुमारे ५० लाख कृषिपंपधारक शेतकरी आहेत. त्यांना महावितरणकडून वीजपुरवठा केला जातो. सध्या महावितरणकडून शेतकऱ्यांना कोणतेही वीजबिल दिले जात नाही. त्यामुळे शेतकऱ्यांनी वापरलेल्या वीजबिलापोटी सरकारने ३४१ कोटी रुपये महावितरणला देण्यात येणार आहेत. त्यामुळे अल्प वीजबिल वसुलीमुळे नेहमीच आर्थिक चणचणीचा सामना करणाऱ्या महावितरणला मोठा दिलासा मिळणार आहे.