मुरबाड, ता. २६ (वार्ताहर) : जिल्हा परिषद व पंचायत समिती निवडणुका जवळ येत असताना, शिवसेना (शिंदे गट) कार्यकर्त्यांनी आत्तापासून संघटना बळकट करण्यासाठी कामाला लागावे, असे स्पष्ट आदेश नेते प्रकाश पाटील यांनी दिले. मुरबाड तालुक्यातील सरळगाव कावेरी हॉल येथे नुकत्याच पार पडलेल्या शिवसेना, युवासेना, महिला आघाडी आणि युवती सेनेच्या संयुक्त कार्यकर्ता मेळाव्यात ते बोलत होते.
विधानसभा आणि लोकसभा निवडणुका आपण एकनाथ शिंदे यांच्या नेतृत्त्वाखाली जिंकल्या. आता जिल्हा परिषद व पंचायत समिती निवडणुकाही जिंकायच्या आहेत. त्यासाठी सर्वप्रथम सभासद नोंदणीवर भर द्या. गावोगावी, वॉर्डागावी आपल्या कामातून लोकांमध्ये विश्वास निर्माण करा, असे आवाहन त्यांनी केले. प्रकाश पाटील यांनी सांगितले की, आपल्या सरकारने शेतकरी, कामगार, महिला यांच्यासाठी अनेक उपयुक्त योजना राबवल्या आहेत. त्या योजना जनतेपर्यंत पोहोचवा. विरोधकांवर टीका करण्यापेक्षा, आपल्या कर्तृत्वाने लोकांचा विश्वास संपादन करा. चांगली माणसे जोडा आणि संघटनेची ताकद वाढवा. पक्षात नव्याने प्रवेश करणाऱ्या कार्यकर्त्यांबाबत विचारले असता, हा निर्णय पक्षश्रेष्ठींचा असेल. मात्र, आम्ही सर्व नव्या कार्यकर्त्यांचे स्वागतच करू, असेही त्यांनी स्पष्ट केले. कार्यक्रमाला जिल्हाप्रमुख अरविंद मोरे, उपसचिव एकनाथ शेलार, नगरसेवक व महिला पदाधिकारींसह शेकडो शिवसैनिक उपस्थित होते.