बदलापूर, ता. २७ (बातमीदार) : राज्यात पक्ष विभाजनानंतर बदलापूर शहरात राष्ट्रवादी शरद पवार गट मजबूत होईल, असे वाटत होते. मात्र, सध्या पदाधिकारी आणि कार्यकर्ते किती शिल्लक आहेत? हे पाहण्याची वेळ आली आहे. लोकसभा निवडणुकीपर्यंत शहराध्यक्षपदाची जबाबदारी घेतलेल्या, शैलेश वडनेरे यांनी विधानसभा निवडणुकीत उमेदवारी न मिळाल्याच्या रागात पदाचा राजीनामा दिला. तेव्हापासून एकही चेहरा शहराध्यक्षपदासाठी पक्षाकडे नाही, अशी चर्चा सुरू झाली आहे.

बदलापूर शहरात १९९५ च्या पहिल्या पालिका निवडणुकीपासून शिवसेना आणि त्यानंतर भाजप हे दोन पक्ष आपले प्राबल्य अजूनही टिकवून आहेत. मात्र, राष्ट्रवादी काँग्रेस व काँग्रेसला अजूनही सुगीचे दिवस आलेले नाहीत. या दोन्ही पक्षांच्या बाबतीत विचार केला तर, भाजप-शिवसेनापाठोपाठ राष्ट्रवादी हा पक्ष कॅप्टन आशीष दामले यांच्या नेतृत्वाखाली आपले वेगळे अस्तित्व उभे करत होता. या पक्षाने शहरातील एक मोठा मतदार वर्ग तयारही केला; मात्र राज्यातील पक्ष विभाजनानंतर शहरातील चित्र साफ बदलले. दामले यांनी राष्ट्रवादी अजित पवार गटाची जबाबदारी घेतल्याने शरद पवार गटाला मोठा धक्का बसला. भक्कम नेतृत्व नसल्याने, शिवसेनेतून नाराजी म्हणून बाहेर पडलेल्या माजी नगरसेवक शैलेश वडनेरे यांना पक्षात घेऊन शरद पवार गटाने त्यांच्या गळ्यात शहराध्यक्षपदाची माळ घातली.
वडनेरे यांच्या नेतृत्वाखाली लोकसभेची निवडणूक पार पडली. यावेळी मविआचे उमेदवार सुरेश म्हात्रे हे कपिल पाटलांचा पराभव करून चांगल्या मतांनी विजयी झाले. शहराध्यक्ष पदाची जबाबदारी असलेल्या वडनेरे यांच्या कामगिरीवर वरिष्ठांनी समाधान दाखवले. त्यानंतर विधानसभा निवडणुकीच्या वेळी उमेदवारी मिळवण्यासाठी वडनेरे यांनी प्रयत्न केले; मात्र पक्षाने उमेदवारी नाकारली. यावर नाराज झालेले वडनेरे यांनी शहराध्यक्ष आणि सदस्यपदाचा राजीनामा दिला. त्‍यानंतर शरद पवार गटाकडे शहराध्यक्षपदासाठी योग्य चेहरा नसल्याचे बोलले जात आहे.

पक्षासमोर आव्हान
पक्षाची ताकद शहरात कमी होत असून, कार्यकर्ते आणि पदाधिकारी यांचीच संख्या कमी होत असल्याची चर्चा शहरात सुरू आहे. त्यामुळे मविआतील प्रमुख घटक पक्ष असलेल्या शरद पवार गटाला आगामी पालिका निवडणुकीला सामोरे जाताना आव्हाने स्वीकारावी लागणार आहेत.