गुगल मॅपच्या चुकीमुळे बेलापूर खाडीत
कोसळली महिला चालकाची कार
नवी मुंबई, ता. २६ (वार्ताहर) : गुगल मॅपच्या चुकीच्या मार्गदर्शनामुळे बेलापूर खाडीत एका महिलेची ऑडी कार कोसळल्याची घटना शुक्रवारी (ता. २५) पहाटे घडली. जवळच असलेल्या सागरी सुरक्षा पोलिस आणि इंडियन रेस्क्यू अकॅडमीच्या जवानांनी तत्काळ बचावकार्य राबवत महिलेचे प्राण वाचवले. या घटनेमुळे गुगल मॅपवर संपूर्णपणे अवलंबून राहण्याचे धोके पुन्हा एकदा समोर आले आहेत.
खारघर येथील श्वेता शर्मा (वय २९) मध्यरात्री १ वाजता उलवेकडे जात असताना, गुगल मॅपने त्यांना खाडी पुलाखालचा रस्ता निवडण्याची सूचना केली. अंधारात हा रस्ता थेट ध्रुवतारा जेट्टीवरून खाडीत जात असल्याचे त्यांच्या लक्षात आले नाही आणि त्यांची कार थेट खाडीत कोसळली. प्रसंगावधान राखत श्वेता शर्मा गाडीची डिकी उघडून बाहेर पडल्यामुळे बचावल्या. हा प्रकार त्या ठिकाणी तैनात असलेल्या सागरी सुरक्षा पोलिस चौकीतील जवानांच्या निदर्शनास आल्यानंतर त्यांनी तत्काळ गस्ती बोट व रेस्क्यू बोटीद्वारे महिलेचा शोध घेत तिला सुखरूप बाहेर काढले. त्यानंतर क्रेनच्या सहाय्याने खाडीत कोसळलेली कार बाहेर काढण्यात आली.
पोलिसांनी नागरिकांना डिजिटल मार्गदर्शकांवर पूर्णपणे अवलंबून न राहता, विशेषतः अनोळखी परिसरात प्रवास करताना स्थानिक माहितीची खात्री करून अधिक सावधगिरी बाळगण्याचे आवाहन केले आहे.