सलग दुसऱ्या दिवशी पावसामुळे लोकल विलंबाने
मुंबई : शहरासह उपनगरांत शुक्रवारपासून सुरू असलेल्या सततच्या पावसाचा परिणाम दुसऱ्या दिवशीही मुंबईतील लोकल सेवांवर दिसून आला. मध्य आणि पश्चिम रेल्वे मार्गावरील गाड्या शनिवारी (ता. २६) दिवसभर उशिराने धावत होत्या, तर काही वेळा अत्यंत धीम्या गतीनेही चालवण्यात आल्या. मध्य रेल्वेच्या मुख्य आणि हार्बर मार्गावर लोकल सेवा १० ते १५ मिनिटे उशिराने सुरू होत्या. पश्चिम रेल्वे मार्गावरही परिस्थिती वेगळी नव्हती. परिणामी, कार्यालयात पोहोचताना मुंबईकर प्रवाशांना विलंबाचा सामना करावा लागला. पावसामुळे दृश्यमानता कमी झाल्याने मोटरमन आणि लोको पायलटने खबरदारीचा उपाय म्हणून वेग मर्यादित ठेवला, त्यामुळे संपूर्ण रेल्वे वेळापत्रक कोलमडले.