तडीपार आरोपीला हत्यारासहित जेरबंद
अंबरनाथ, ता. २६ (वार्ताहर) : अंबरनाथमध्ये घरफोडी आणि चोरी करणाऱ्या साहिल विनोद पाटील (वय २४) या तडीपार आरोपीला उल्हासनगर गुन्हे शाखेने हत्यारासहित जेरबंद केले.
उल्हासनगरच्या गायकवाड पाडा परिसरातील साहिल हा रेकॉर्डवरील गुन्हेगार असून त्याला दोन वर्षासाठी ठाणे जिल्हासह, मुंबई शहर, उपनगर, तसेच रायगड जिल्ह्यातील कर्जत व पनवेल तालुक्यातून दोन वर्षासाठी तडीपार करण्यात आल्याचे आदेश असतानाही, तो अंबरनाथ येथील शिवगंगानगर परिसरात शुक्रवारी (ता. २५) हत्यारासहित येणार असल्याची माहिती उल्हासनगर गुन्हे शाखेचे पोलीस हवालदार राजेंद्र रघुनाथ थोरवे यांना मिळाली होती. या माहितीच्या आधारे पोलिसांनी सापळा रचून साहिल पाटील याला पकडले असता त्याच्याजवळ धारदार चाकू सापडला. त्याने यापूर्वीही चाकूचा धाक दाखवत चोरी, घरफोडी केल्या होत्या. या अनुषंगाने ही कारवाई उल्हासनगर गुन्हे शाखा घटक ४ चे वरिष्ठ पोलीस निरीक्षक योगेश आव्हाड यांच्या मार्गदर्शनाखाली करण्यात आली असून गुन्हा दाखल करण्यात आला आहे.