...तर भिवंडीच्या खासदारांचा नागरी सत्कार करणार
माजी केंद्रीय मंत्री कपिल पाटील ः जिजामाता यांचे नाव वापरून संस्थेद्वारे होणाऱ्या गैरकारभाराची शासनाने चौकशी करावी
सकाळ वृत्तसेवा
डोंबिवली, ता. २६ ः मागील दहा वर्षांत भिवंडी लोकसभा क्षेत्रात हजारो कोटी रुपयांची विकासकामे केली आहेत. विद्यमान खासदारांनी इतकी विकासकामे केली असतील तर ती दाखवून द्यावी, आपण त्यांचा जाहीर नागरी सत्कार करू, अशा शब्दांत माजी केंद्रीय राज्यमंत्री कपिल पाटील यांनी खासदार सुरेश म्हात्रे यांनी केलेल्या दाव्याची खिल्ली उडवली.
दहा वर्षांच्या कार्यकाळात झालेल्या विकासकामांची माहिती देण्यासाठी आयोजिलेल्या एका कार्यक्रमात ते बोलत होते. एखादी व्यक्ती खरोखर विकास करीत असेल तर ती कोणत्या पक्षाची आहे, हे महत्त्वाचे नाही. जनतेच्या हिताचे काम जर कोणी खरेच करीत असेल आणि ती कामे त्यांनी आपल्याला दाखवली तर त्याबाबत कोणताही आकस असू नये. गेल्या दहा वर्षांत कमीत कमी २८ ते २९ हजार कोटींची विकासकामे मंजूर केली असून ही सर्व कामे सुरू असल्याचे आपल्याला दिसून येईल आणि ते म्हणत आहेत तर आपणही त्यांना विचारले पाहिजे, की तुम्ही केलेली दोन-चार कामे तरी दाखवा, असे सांगत कपिल पाटील यांनी नाव न घेता म्हात्रे यांच्यावर टीका केली.

तत्कालीन आघाडी सरकारमुळे रखडली कल्याण मेट्रो
भिवंडी आणि कल्याण या दोन्हींकडील बदललेल्या डीपीआरला मान्यता देण्याकडे आघाडी सरकारने साफ दुर्लक्ष केल्यानेच कल्याण मेट्रो रखडल्याचा आरोप त्यांनी या वेळी केला; मात्र विद्यमान मुख्यमंत्री देवेंद्र फडणवीस यांनी नुकतेच दोन्ही डीपीआर मंजूर केले असून आता लवकरच या कल्याण मेट्रोच्या कामाला सुरुवात होईल, असा विश्वासही त्यांनी या वेळी व्यक्त केला.

जिजामातांचे नाव वापरून भ्रष्टाचार करणाऱ्या संस्थेची चौकशी व्हावी
एखादी ठेकेदार संस्था जिजामातांचे नाव वापरून भ्रष्टाचार, बोगस काम करीत असतील तर त्यांना हे नाव वापरू न देण्यासाठी राज्य सरकारने कार्यवाही केली पाहिजे, असे सांगत कपिल पाटील यांनी जिजाऊ संघटना आणि या संस्थेचे प्रमुख नीलेश सांबरे यांच्या कारभारावर नाव न घेता ताशेरे ओढले.