अलिबाग, ता. २७ (वार्ताहर)ः दोन महिन्यांपासून बंद असलेला मासेमारीचा हंगाम सुरू होत आहे. यासाठीच्या पूर्वतयारी कोळीवाड्यांमध्ये सुरू असून, होड्यांची डागडुजीसह खवळलेल्या समुद्राला शांत होण्याची प्रार्थना देवाकडे करीत आहेत.
अलिबाग, आक्षी, आग्राव, वरसोली, थळ, नावगाव, बोडणी आणि रेवस मिळून हजारो मासेमारी नौका शासन आदेशाप्रमाणे किनाऱ्यावर विसावल्या होत्या. १ ऑगस्टपासून मासेमारीचा नवीन हंगाम सुरू होणार लगबग सुरू आहे. पूर्वतयारीसाठी समुद्रकिनारी जाळी विणणे, होड्यांना तेल-पाणी, रंग लावणे, बोर्ड रंगवणे अशी कामे अंतिम टप्प्यात आहेत. त्याचबरोबर होडीत जाळींसह डिझेल, बर्फ, अन्नधान्य भरणे, तसेच खलाशांची जमवाजमव सुरू आहे.
----------------------------------
कोळीबांधवांमध्ये उत्साह
गेल्या चार वर्षांपासून समुद्रातील हवामान बिघडल्याने वादळामुळे कोळीबांधव आर्थिक नुकसानीत आहे. पावसाळ्यात मत्स्य प्रजनन काळ असल्यामुळे दोन महिने खोल समुद्रातील मासेमारीसाठी बंद असते. त्यामुळे किनाऱ्यालगतच जवळा, कोळंबी, बोईट अशा मासळीवर उपजिविका सुरू ठेवावी लागत होती, पण हंगाम सुरू होणार असल्याने कोळीबांधवांमध्ये उत्साह आहे.
-----------------------------------------
कौल लावण्याचा प्रघात
कोळी समाज हा धार्मिक परंपरा जपणारा असून, समुद्रात होड्या नेण्यापूर्वी आराध्य दैवत मल्हार मार्तंड देवाला कौल लावण्याचा त्यांचा प्रघात आहे. तसेच होडीची पूजा-अर्चा करून होड्या समुद्रात सोडल्या जातात. सरकार आर्थिक संकटात सापडलेल्या शेतकरी बांधवांसाठी मदत करते. तशी कोळीबांधवांनादेखील आर्थिक मदत करावी, अशी मागणी वेस्टकॉस्ट पर्सनियन नेट वेल्फर असोसिएशनचे जिल्हाध्यक्ष डॉ. कैलास चैलकर यांनी केली.