कल्याण पश्चिमेतील वाहतुकीत बदल
वाहतूक कोंडी सोडविण्यासाठी पोलिस उपायुक्तांकडून अधिसूचना जारी
कल्याण, ता. २७ (वार्ताहर) : पश्चिमेतील वाहतूक कोंडी फोडण्यासाठी वाहतूक पोलिस उपायुक्तांनी एक अधिसूचना जारी केली आहे. या अधिसूचनेनुसार कल्याण पश्चिमेतील सर्वात व्यस्त चौकांपैकी एक असलेल्या सहजानंद चौकातील वाहतुकीमध्ये मोठे बदल केले आहेत. कल्याणमधील वाहतूक कोंडीसंदर्भात मनसेचे माजी आमदार प्रकाश भोईर आणि त्यांच्या शिष्टमंडळाने काही दिवसांपूर्वी वाहतूक विभागाच्या सहाय्यक पोलिस आयुक्तांची भेट घेतली होती. या वेळी सहजानंद चौक येथील वाहतूक कोंडी सोडवण्यासाठी काही बदल करण्याच्या सूचना मनसेचे पदाधिकारी गणेश चौधरी, कपिल पवार आणि गणेश लांडगे यांनी केल्या होत्या. या सूचनेनुसार वाहतूक पोलिसांनी या ठिकाणी काही बदल केले आहेत.
कल्याण पश्चिमेतील सहजानंद चौक हा अतिवर्दळीचा रस्ता असून याठिकाणी संतोषी माता रस्ता, आग्रा रस्ता, अहिल्याबाई चौकाकडे जाणारा रोड, काळा तलाव आणि काळी मशिदीकडे जाणारा असे एकूण सहा रस्ते एकत्र येतात. त्यापैकी सहजानंद चौकाकडून संतोषी माता रस्तामार्गे रामबागकडे जाणाऱ्या मार्गावर मोठ्या प्रमाणात रहदारी असल्याने याठिकाणी वाहतूक कोंडी होत असते. या पार्श्वभूमीवर सहजानंद चौकात वाहतूक कोंडी होऊ नये आणि परिसरातील वाहतूक सुरळीत राहण्यासाठी वाहतूक पोलिस उपायुक्त पंकज शिरसाट यांच्याकडून हे बदल करण्यात आले आहेत.

बदललेले मार्ग
* सहजानंद चौकातून संतोषी माता रस्तामार्गे रामबागकडे जाणाऱ्या वाहनांना सहजानंद चौक येथे प्रवेश बंद करण्यात येत आहे. त्याऐवजी मकबरा चौक येथे वळून ही वाहने ही सहजानंद चौक मकबरा रस्त्याने पुढे जाऊन साती आसरा मंदिरामार्गे वळण घेत पुढे संतोषी माता चौक येथून रामबागकडे जाऊ शकतील.
* चिकण घराकडून काळा तलावमार्गे सहजानंद चौककडे येणाऱ्या वाहनांना साती आसरा मकबरा चौक येथे प्रवेश बंद करण्यात येत आहे. त्याऐवजी ही वाहने साती आसरा मकबरा चौकमार्गे डावे वळण घेऊन संतोषी माता चौकमार्गे इच्छितस्थळी जाऊ शकतील.
* संतोषी माता चौक (कल्याण पोळी-भाजी केंद्र) ते सहजानंद चौक मार्ग हा रामबागकडून संतोषी माता रस्तामार्गे सहजानंद चौकाकडे जाणाऱ्या वाहनांना एकदिशा मार्ग करण्यात येत आहे. ही अधिसूचना ३० दिवस प्रायोगिक तत्त्वावर लागू होणार असल्याचेही वाहतूक पोलिसांनी स्पष्ट केले आहे.