विद्यार्थ्यांना लोकशाहीचा प्रत्यक्ष अनुभव
पनवेल, ता. २७ (बातमीदार) ः कळंबोली येथील महाराष्ट्र एज्युकेशन सोसायटीच्या ज्ञानमंदिर विद्यालयात वर्गप्रतिनिधी निवडणुका अनोख्या पद्धतीने पार पडल्या. देशातील लोकशाही प्रक्रियेची सजीव अनुभूती देण्यासाठी यंदा प्रथमच ईव्हीएम मशीनच्या माध्यमातून निवडणुका घेण्यात आल्या. या उपक्रमाने शाळेतील विद्यार्थी, शिक्षक आणि पालकांमध्ये विशेष उत्साह निर्माण केला.
शाळेतील इयत्ता दहावीच्या विद्यार्थ्यांनी शिक्षकांच्या मार्गदर्शनाखाली स्वतः ईव्हीएम मशीन तयार केली. निवडणूक प्रक्रियेची अधिसूचना, अर्ज स्वीकृती, छाननी, माघार घेण्याची अंतिम मुदत आणि प्रचार अशा टप्प्यांमधून विद्यार्थ्यांची ही निवडणूक पार पाडली. या संपूर्ण प्रक्रियेत विद्यार्थ्यांनीच निवडणूक आयोगाची स्थापना केली होती. विद्यार्थिनी प्रांजल यादव हिची निवडणूक आयुक्त म्हणून निवड करण्यात आली. एकूण १६ विद्यार्थ्यांनी निवडणूक विभागात काम करीत प्रत्यक्ष निवडणूक आयोजनाचे कौशल्य आत्मसात केले. मतदान, मतमोजणी आणि निकाल घोषणाही विद्यार्थ्यांनीच पार पाडली. या उपक्रमासाठी शाळेतील शिक्षक उद्धव कदम यांनी विद्यार्थ्यांना निवडणूक प्रक्रियेचे प्रशिक्षण दिले. विद्यालयाच्या मुख्याध्यापिका संजना बाईत यांचे विशेष मार्गदर्शन व सहकार्य लाभले. या अभिनव उपक्रमामुळे विद्यार्थ्यांना लोकशाही मूल्यांची प्रात्यक्षिक ओळख मिळाली असून, विज्ञान आणि तंत्रज्ञानाच्या वापरातून निवडणुका कशा पार पडतात याचा शैक्षणिकदृष्ट्या मौल्यवान अनुभव त्यांना मिळाला.