संत ज्ञानेश्वर शाळेचा होणार कायापालट
‘सकाळ’च्या वृत्तानंतर हालचाली ः संत ज्ञानेश्वर शाळेच्या दुरुस्तीला सुरुवात
टिटवाळा, ता. २७ (वार्ताहर) ः कल्याण-डोंबिवली महानगरपालिका क्षेत्रातील मांडा पश्चिम येथील संत ज्ञानेश्वर शाळा क्रमांक ६०च्या दुरवस्थेचे ‘सकाळ’मध्ये वृत्त प्रकाशित झाले होते. या वृत्ताची गंभीर दखल घेण्यात आली असून, शाळेच्या दुरुस्तीच्या कामांना सुरुवात करण्यात आली आहे.
शाळेतील फाटलेले पत्रे, खचलेले फाउंडेशन आणि अंधाऱ्या शौचालयांसारख्या समस्या यामुळे विद्यार्थ्यांच्या सुरक्षेचा प्रश्न ऐरणीवर आला होता. ही बाब ‘सकाळ’ने अधोरेखित करताच, केडीएमसी प्रशासन जागे झाले आहे. शाळेच्या दुरुस्तीच्या प्रारंभी टप्प्यात पुढील कामांना गती देण्यात आली आहे.
या कारवाईत माजी उपमहापौर बुधाराम सरनोबत यांनी पुढाकार घेतला असून, त्यांनी शाळेची पाहणी करून आयुक्तांना निवेदन देण्याचे आश्वासन दिले आहे. या शाळेत सध्या २५० विद्यार्थी शिक्षण घेत असून, प्रशासनाच्या हालचालीमुळे विद्यार्थ्यांच्या पालक आणि शिक्षकांमध्ये काही प्रमाणात समाधान व्यक्त होत आहे.
केडीएमसीने ‘निपुण भारत अभियान’, सेमी इंग्रजी शाळांची घोषणा, मोफत शैक्षणिक साहित्यवाटप, ‘विनोबा भावे ॲप’द्वारे डिजिटल मॉनिटरिंग अशा योजना जाहीर करीत असतानाच, प्रत्यक्षात जुन्या शाळांच्या दुरवस्थेची वेळेवर दखल घेणे ही बाब महत्त्वाची आहे.
संत ज्ञानेश्वर शाळेच्या दुरुस्तीला सुरुवात झाल्यामुळे शाळा वाचली असल्याचा संदेश मिळाला असून, केवळ नव्या घोषणा न करता विद्यमान शाळांची देखभाल हेदेखील तितकेच महत्त्वाचे असल्याचे मत येथील ग्रामस्थ ज्ञानेश्वर मढवी यांनी व्यक्त केले आहे.

‘या’ दुरुस्त्या होणार
* उखडलेले पत्रे आणि छत दुरुस्त करण्यास प्रारंभ
* पावसाचे पाणी टाळण्यासाठी जलनिच्छेदनाची व्यवस्था
* शाळेच्या परिसरातील साफसफाई आणि खड्डे बुजविण्याचे काम
* सुरक्षिततेसाठी फाउंडेशन परिसरात संरक्षक जाळी बसविण्याची प्रक्रिया सुरू