अंबरनाथमध्ये दारू अड्ड्यावर कारवाई
अंबरनाथ, ता. २७ (वार्ताहर) ः अंबरनाथमध्ये विविध ठिकाणी छापे मारून अमली पदार्थ, जुगार व दारू अड्ड्यावर पोलिसांनी कारवाई केली. यामध्ये सात ते आठ जणांवर गुन्हे दाखल करण्यात आले आहेत. अंबरनाथमध्ये अनेक ठिकाणी राजरोसपणे जुगार व अड्डे सुरू आहेत. अनेकदा पोलिसांनी छापे टाकून हे अड्डे उद्ध्वस्त केले; मात्र तरीही शहरातील जुगार अड्डे, दारूचे अड्डे व अमली पदार्थांची विक्री ही सर्रास होत आहे. त्यामुळे पूर्व व पश्चिम भागात पोलिसांनी संयुक्त कारवाई करीत अनेक ठिकाणी छापा टाकला. या वेळी शहरातील छत्रपती शिवाजी मार्केट परिसरात प्राण्यांच्या हॉस्पिटलशेजारी जुगार अड्डा व एका किराणा स्टोअर्सच्या बाजूला उघड्यावर गावठी दारूची हातभट्टी सुरू असल्याची माहिती पोलिस शिपाई वासुदेव रामभाऊ दराडे यांना मिळाली होती. या माहितीच्या आधारे पोलिसांनी धाड टाकली असता मूर्गेश गणेश देवर (२३), संजय गुप्ता (४३), जॉन्सन मॉर्गस (४३), मनोज सहानी (५३) हे जुगार खेळताना सापडले. या चार जणांवर जुगार बंदी कायद्यानुसार गुन्हा दाखल केला तर विलास म्हात्रे (३४) याच्यावर बेकायदा दारू विक्रीप्रकरणी तसेच दारूबंदी अधिनियम (६५) इ प्रमाणे गुन्हा दाखल केला. दरम्यान, शिवाजीनगर पोलिस ठाण्याच्या हद्दीत आकाश जैस्वाल हा १९ वर्षीय बिगारी कामगार अमली पदार्थ सेवन करताना गावदेवी परिसरात सापडल्याने त्याच्यावर गुन्हा दाखल केला आहे.