गरजेपोटी बांधलेल्या घरांवरील कारवाईविरोधात राष्ट्रवादी काँग्रेसचा मोर्चा
तुर्भे, ता. २७ (बातमीदार) : नवी मुंबईतील माथाडी कामगार आणि अल्प उत्पन्न गटातील (एलआयजी) रहिवाशांनी गरजेपोटी विस्तारलेल्या घरांवर होणाऱ्या कारवाईविरोधात राष्ट्रवादी काँग्रेस पक्ष - शरदचंद्र पवार गट ३१ जुलै रोजी सिडको व नवी मुंबई महापालिका मुख्यालयावर मोर्चा काढणार आहे. हा मोर्चा पक्षाचे प्रदेशाध्यक्ष आमदार शशिकांत शिंदे यांच्या नेतृत्वाखाली होणार असून, सकाळी साडेदहा वाजता पामबीच रोडवरील गंगारामशेठ तांडेल चौक (सेक्टर ५०) येथून सुरुवात होणार आहे, अशी माहिती नवी मुंबई जिल्हाध्यक्ष चंद्रकांत पाटील यांनी दिली.
सिडकोने कोपरखैरणे, घणसोली, ऐरोली, तुर्भे, सानपाडा, नेरूळ या भागांत सुमारे ४० वर्षांपूर्वी माथाडी कामगार व गरीब कुटुंबांसाठी घरे दिली होती. परंतु आजच्या घडीला कुटुंबांचा विस्तार झाल्याने रहिवाशांनी आपल्या गरजेनुसार अतिरिक्त मजले बांधले आहेत. यावर न्यायालयाच्या आदेशानुसार महापालिकेने ही बांधकामे पाडण्याची तयारी सुरू केली असून, नोटीस बजावण्याचे सत्र अंतिम टप्प्यात आहे. राष्ट्रवादी काँग्रेसच्या म्हणण्यानुसार, रहिवाशांनी ही घरे कर्ज काढून खरेदी केली आहेत आणि वाढीव बांधकामासाठीही कर्ज घेतलेले आहे. त्यामुळे ती तोडण्याचा निर्णय अन्यायकारक आहे. पक्षाने यापूर्वीही नागरिकांचे मेळावे आयोजित करून त्यांच्या समस्या जाणून घेतल्या आहेत. शशिकांत शिंदे यांनी हा विषय विधान परिषदेमध्ये उपस्थित करीत राज्य शासन व प्रशासनाकडे पाठपुरावा केला आहे. सरकारने त्यावर सकारात्मक भूमिका घेतली असली तरी अद्याप ठोस उपाययोजना झालेली नाही. न्यायालयाच्या आदेशामुळे नागरिकांमध्ये भीतीचे वातावरण निर्माण झाले असून, अनेकांचे जनजीवन विस्कळित झाले आहे. या पार्श्वभूमीवर रहिवाशांच्या हक्कांसाठी व त्यांच्या घरांचे संरक्षण करण्यासाठी हा मोर्चा काढण्यात येत असल्याचे स्पष्ट करण्यात आले. चंद्रकांत पाटील यांनी नागरिकांना मोठ्या संख्येने सहभागी होण्याचे आवाहन केले आहे.