जाईबाई शाळेतील विद्यार्थ्यांचे चेहरे फुलले
प्रशांत भागवत यांच्या माध्यमातून अनोखी भेट
कल्याण, ता. २७ (वार्ताहर) ः कल्याण-डोंबिवली शिक्षण विभागाच्या अंतर्गत असणाऱ्या कल्याण पूर्वेतील जाईबाई शाळेतील मुलांना पालक अधिकारी कार्यकारी अभियंता प्रशांत भागवत यांच्या माध्यमातून अनोखी भेट मिळाली. यामुळे विद्यार्थी प्रफुल्लित झाले होते.
केडीएमसीच्या जाईबाई शाळेचे पालक अधिकारी म्हणून दायित्व घेतलेले प्रशांत भागवत यांनी शाळेतील समस्या जाणून घेतल्या. यासाठी त्यांनी माजी नगरसेवक मनोज रॉय यांच्याकडे मदतीचा हात मागत शाळेतील विद्यार्थ्यांसाठी ब्रॅंण्डेड दप्तर आणि आरओयुक्त कुलरची व्यवस्था करून दिली. शाळा, वर्गखोल्यांबाहेरील परिसरात काँक्रीटीकरणाचे काम केले जात आहे. तर शाळा परिसर स्वच्छतेसंदर्भात पावले टाकण्यात येत आहेत.
नुकतेच शाळेत माजी नगरसेवक मनोज रॉय यांच्या वतीने प्रशांत भागवत यांच्या उपस्थितीत विद्यार्थ्यांना दप्तरवाटप, कुलर व्यवस्था कार्यक्रम झाला. या शाळेतील विद्यार्थी पटसंख्या ३४ झाली आहे. तर पटसंख्यावाढीसाठी शिक्षकांना प्रोत्साहित केले. या वेळी मुलांच्या चेहऱ्यावर आनंद ओसंडून वाहत होता. दरम्यान, पालक अधिकारी प्रशांत भागवत यांनी लोकसहभागातून शाळेतील सुविधेचा प्रश्न मार्गी लागू शकतात, हे यानिमित्ताने दाखविले आहे.

जुलैमध्येच शालेय साहित्याचे वाटप
मनपा शाळांमधील शैक्षणिक दर्जा, सोयीसुविधा तसेच पटसंख्यावाढीबाबत केडीएमसी आयुक्त अभिनव गोयल यांच्या नेतृत्वाखाली महापालिका शाळांचा चेहरामोहरा बदलण्याचा नियोजन उपायुक्त संजय जाधव यांनी तयार केले असून त्याची अंमलबजावणी सुरू केली. यंदा जुलैमध्येच मनपा शाळेमधील विद्यार्थ्यांना गणवेश, पुस्तके, बूट, शालेय साहित्य वाटप करीत पालिकेने बाजी मारली.

विद्यार्थ्यांना आयुक्तांचे धडे
शाळांचे पालकत्वासाठी आधिकाऱ्यांकडे दायित्व दिले असून विद्यार्थ्यांचा शैक्षणिक आलेख आणि प्रगतीसाठी महिन्यातून परीक्षा घेत आढावा सुरू केला आहे. तर, आयुक्त गोयल यांनी मनपा शाळेत जाऊन तासभर विद्यार्थ्यांना शालेय धडे दिले. यावरून प्रशासनाने मनपा शाळांना स्मार्ट करण्यासाठी कंबर कसल्याचे दिसून येत आहे.