मंगळागौरीच्या खेळांनी विष्णुदास भावे बहरले
श्री गोवर्धनी सार्वजनिक सेवा संस्थेच्या पुढाकाराने
सकाळ वृत्तसेवा
नवी मुंबई, ता. २८ : श्री गोवर्धनी सार्वजनिक सेवा संस्थेतर्फे वाशीतील विष्णुदास भावे नाट्यगृहात मंगळागौर कार्यक्रमाचे आयोजन करण्यात आले होते. याप्रसंगी बालगंधर्व पुरस्कार २०२३ सन्मानित महाराष्ट्र लावणी सम्राट आशीमिक कामठे यांच्या लावणीने टाळ्यांच्या आवाजाने सभागृह दुमदुमला. मंगलागौरी कार्यक्रमामध्ये पारंपरिक वेशात महिला सहभागी झाल्या होत्या. मंचावर मंगळागौरीचे खेळ, गाणी सादर करीत असताना सभागृहात उपस्थित महिलांनी नाचगाण्याचा मनमुराद आनंद लुटला. या वेळी महिलांच्या आग्रहास्तव आमदार मंदा म्हात्रे यांनीही तालावर ठेका धरला. महिलांनी मंगळागौरीची पारंपरिक नृत्ये, गाणी म्हणत खेळ खेळून मनमुराद आनंद लुटला. लाट्या बाई लाट्या, सारंगी लाट्या, फू बाई फू, अठुडं केलं गठुडं केलं अशी पारंपरिक गाणी आणि खेळ महिला खेळल्या. सदर मंगळागौरीच्या कार्यक्रमात उत्कृष्ट नृत्य, पारंपरिक गायन व विविध प्रकारच्या कला दाखविणाऱ्या महिलांना विविध प्रकारची बक्षिसे देऊन सन्मानित केले. प्रथम परितोषिक म्हणून सीवूड्स येथील राजमाता जिजाऊ महिला मंडळ व नेरूळ (प) मधील हाउस क्वीन मंगला गौर ग्रुप यांनी पटकावला. त्यांना पाच हजार एक रुपये व दोन पैठणीसहित एक नथ, तर द्वितीय पारितोषिक सीबीडी येथील सह्याद्री मंगळागौर ग्रुप यांना तीन हजार एक रुपयांचे व एक पैठणीसहित एक नथ, तर तृतीय पतितोषिक साई भक्त महिला फाउंडेशन यांना दोन हजार रुपये व एक पैठणीसहित एक नथ व सर्व स्पर्धकांना प्रमाणपत्र देऊन गौरविण्यात आले.