अशेरी गडावर शिवभक्तांचा पर्यावरण संवर्धनाचा अनोखा उपक्रम
कासा, ता. २९ (बातमीदार) ः डहाणू तालुक्यातील ऐतिहासिक अशेरी किल्ल्यावर शिवशाही प्रतिष्ठान या संस्थेच्या वतीने रविवारी (ता. २७) स्वच्छता आणि पर्यावरणपूरक मोहीम राबविण्यात आली. संस्थापक अध्यक्ष विनीत आत्माराम किणी यांच्या नेतृत्वाखाली आणि शिवभक्तांच्या सहभागातून ही मोहीम राबवली.
या मोहिमेअंतर्गत गडावरील सर्वात मोठ्या टाकीची साफसफाई करण्यात आली. या टाकीची उंची अंदाजे १० ते १२ फूट तर रुंदी २५ ते ३० फूट इतकी आहे. टाकीतील साचलेला कचरा स्टील आणि प्लॅस्टिकच्या बादल्या दोरीच्या सहाय्याने बाहेर काढला. पाण्याचा स्रोत स्वच्छ ठेवण्यासाठी टाकीवर नेट बसवून शेवटी झाकण घालण्यात आले.
गडावर वृक्षारोपणाचे कार्यदेखील हाती घेण्यात आले. आंबा आणि पिंपळाच्या झाडांची लागवड करण्यात आली. विशेष म्हणजे या उपक्रमात जिल्हा परिषद शाळा डहाणू आंबेमोरा येथील शिक्षक वैशाली पाटील यांच्या मार्गदर्शनाखाली विद्यार्थ्यांनी सहभाग घेतला. विद्यार्थ्यांनी विविध प्रकारच्या झाडांच्या बिया गोळा करून माती आणि शेण यांच्या मिश्रणातून तब्बल एक हजार सीड बॉल्स तयार केले. या बियांचे रोपात रूपांतर होऊन भविष्यात पर्यावरणाचा समतोल राखण्यास मदत होईल, असा विश्वास व्यक्त करण्यात आला.
या संपूर्ण उपक्रमात तालुकाप्रमुख शिवभक्त अमित राऊत, शिवभक्त सचिन तांडेल (वरोर शाखा प्रमुख), शिवभक्त कौस्तुभ हंभिरे (युवा शाखा प्रमुख, मुरबे), शिवभक्त अजय दाभाडे (तणाशी), शिवभक्त विशाल गावड, शिवभक्त प्रसाद पाटील, शिवकन्या कल्याणी गावड, शिवभक्त अजय कडू, शिवभक्त सूरज सापटे, शिवभक्त निशू पाटील, तसेच लहान शिवभक्त कार्तिकेय तांडेल यांनी विशेष मेहनत घेतली.