पोगावात होणार अद्यावत अग्निशामक केंद्र
भिवंडी, ता. २९ (बातमीदार) : भिवंडी शहर आणि परिसरात विविध ठिकाणी लागणाऱ्या आगीच्या घटना, त्यामुळे उद्भवणारी परिस्थिती, अचानक घडलेल्या अपघाती घटनांमुळे नागरिकांच्या जीवाला, तसेच मालमत्तेला धोका होऊ नये यासाठी अद्यावत सुसज्ज अग्निशामक दलाचे केंद्र करण्याच्या हालचाली ठाणे नियोजन समितीच्या वतीने सुरू झाल्या आहेत. याबाबत भिवंडी महापालिकेकडून प्रस्ताव मागविण्यात आला आहे.

औद्योगिक आणि रहिवासी संकुलात तत्काळ सेवा देण्यासाठी भिवंडीला अद्ययावत अग्निशामक दलाची नितांत गरज होती. यासाठी शिंदे गटाचे शिवसेना शहर जिल्हाप्रमुख सुभाष माने यांनी मुख्यमंत्र्यांना लेखी पत्र पाठवून अद्ययावत व सुसज्ज अग्निशामक दलाची आवश्यकता नमूद करीत निधीची मागणी केली. हा विषय ठाणे जिल्हा नियोजन समितीकडे आला असून, समितीमार्फत लेखी पत्राद्वारे महापालिकेस विचारणा केली आहे. त्या पत्रानुसार महापालिकेच्या कार्यक्षेत्रातील पोगाव परिसरात आरक्षित जागेवर अग्निशामक केंद्र बांधण्यासाठी पाच कोटी खर्च येणार आहे, तर शहरातील नवीन अग्निशामक केंद्र बांधण्यासाठी तीन कोटी खर्च येणार आहे. या प्रस्तावित कामाच्या अनुषंगाने प्रत्यक्ष स्थळाची पाहणी करून अर्थसंकल्पीय तरतूद आणि सदर कामांसाठी पालिकेकडे असलेली तरतूद तसेच इतर संबंधित विषयांची माहितीचा प्रस्ताव पाठविण्यास सांगितले आहे. त्यामुळे भिवंडीसाठी नव्याने अद्ययावत अग्निशामक केंद्र लवकर बनविण्याच्या हालचालींना वेग आल्याचे प्रशासकीय पातळीवरून सांगितले जाते.

भिवंडी महानगरपालिका आणि ग्रामीण भागात मोठ्या प्रमाणात विकासकामे सुरू असल्याने अद्ययावत अग्निशामक केंद्राची आवश्यकता आहे. पोगाव येथे महापालिकेची आरक्षित जागा असून, तेथे अग्निशामक केंद्र बनल्यास गोदाम भागातील घटनास्थळी जलद जाणे शक्य होणार आहे, तर भिवंडीतील मुख्य लोकवस्तीत ठाणगे आळीतील अग्निशामक दलाचे जुने कार्यालय आणि केंद्र याची जुनी वास्तू तोडण्याचे काम सुरू आहे. तेथे नवीन केंद्र उभारता येणे शक्य आहे. यासाठी प्रस्ताव या आठवड्यात पाठविणार आहे.
- सचिन नाईक, अतिरिक्त शहर अभियंता, भिवंडी महापालिका