खड्ड्यांवर रांगोळ्या, होड्यांतून निषेध
शिवसेनेचे मिलिंदनगरमध्ये हटके आंदोलन
सकाळ वृत्तसेवा
डोंबिवली, ता. २९ ः कंत्राटदाराचा झोल, खड्ड्यात गेला तोल, शून्य झाले जीवनाचे मोल, येरे येरे पावसा, कंत्राटदार खातात पैसा, रस्ता गेला वाहून, खड्डा गेला राहून, अशा उपरोधिक घोषणा देत शिवसेना ठाकरे गटाच्या वतीने अनोखे आणि हटके पद्धतीने आंदोलन करण्यात आले. कल्याण पश्चिममधील मिलिंदनगर परिसरात खड्ड्यांविरोधात मंगळवारी (ता. २९) आंदोलन केले.
कल्याण शिवसेनेच्या पदाधिकाऱ्यांपैकी सतीश वायचळ, विशाल कांबळे, उमेश म्हात्रे, गणेश कांबळे, सुनील उतेकर यांच्या नेतृत्वाखाली शेकडो शिवसैनिक आणि स्थानिक नागरिकांनी या आंदोलनात सहभाग घेतला. या आंदोलनात खड्ड्यांमध्ये रंगीबेरंगी कागदी होड्या सोडण्यात आल्या, तर महिलांनी खड्ड्याभोवती रांगोळ्या काढत प्रशासनाच्या निष्क्रियतेचा जाहीर निषेध केला.
महापालिका प्रशासनाच्या गलथान कारभारावर निशाणा साधत शिवसैनिकांनी जोरदार घोषणाबाजी केली. स्थानिक नागरिकांच्या जीविताला धोका निर्माण करणाऱ्या या खड्ड्यांकडे प्रशासनाचे दुर्लक्ष होत असल्यामुळे संतप्त शिवसैनिकांनी या आंदोलनाचा मार्ग स्वीकारला. या आंदोलनाच्या माध्यमातून नागरिकांच्या रोजच्या दैनंदिन जीवनात निर्माण झालेल्या समस्यांवर प्रकाश टाकत, संबंधित महापालिका अधिकाऱ्यांवर कठोर कारवाई करावी आणि तत्काळ रस्त्यांची डागडुजी करावी, अशी जोरदार मागणी या वेळी शिवसैनिकांकडून करण्यात आली.