भिवंडी, ता. २९ (बातमीदार) : राज्यात नव्याने यंत्रमाग कामगार येत नसल्याने येथील कामगारांवर अतिरिक्त कामाचा ताण वाढला आहे. काही ठिकाणी पर्यायी रोजगार निर्माण झाल्याने यंत्रमागची संख्या कमी होऊ लागली आहे. या व्यवसाय आणि कामगार समस्यांकडे सरकारचे लक्ष वेधण्यासाठी राज्यभरातील यंत्रमाग कामगार आपल्या मागण्यासाठी १ ऑगस्टला मुंबईतील आझाद मैदानावर महाराष्ट्र राज्य पावरलूम कामगार युनियन्स फेडरेशन (सिट्टू) संघटनेच्या बॅनरखाली एकवटणार आहे.
महाराष्ट्रात सर्वाधिक यंत्रमाग आहेत. यापैकी भिवंडीमध्ये ४० हजार ४१० यंत्रमाग कारखाने असून पाच लाखांहून अधिक यंत्रमाग आहेत. तर सुमारे ४.५ लाख कामगार या व्यवसायात कार्यरत आहेत. मात्र, या कामगारांना सामाजिक सुरक्षा, ओळखपत्रे, अपघाती विमा, बोनस व योग्य सुविधा अद्याप दिल्या जात नाहीत. कामगार कायद्यांचेही अंमलबजावणी होत नाही.
त्यामुळे आपल्या हक्कासाठी राज्यव्यापी आंदोलन छेडले आहे. यासाठी शुक्रवारी (ता. १) सकाळी ११ वाजता मुंबईतील आझाद मैदान येथे महाराष्ट्र राज्यातील यंत्रमाग कामगारांचे राज्यव्यापी निषेध आंदोलन होणार आहे. या आंदोलनाचे नेतृत्व सिट्टू संघटना करणार आहे. महाराष्ट्रातील सोलापूर, इचलकरंजी, मालेगाव येथील यंत्रमाग कामगार या आंदोलनात सहभागी होणार आहेत, अशी माहिती भिवंडीतील सिट्टू संघटनेचे अध्यक्ष सुनील चव्हाण यांनी दिली.

वर्षानुवर्षांपासून संघर्ष
यंत्रमाग कामगारांच्या कल्याणासाठी राज्य सरकारने महाराष्ट्र यंत्रमाग कामगार कल्याण मंडळाची स्थापना करावी, जेणेकरून यंत्रमाग कामगारांना सरकारकडून ओळखपत्रे मिळतील. त्यांना आपत्कालीन परिस्थितीत मृत्यू झाल्यास १० लाख रुपये, दिवाळी बोनस आणि कामाच्या ठिकाणी योग्य सुविधा मिळाव्यात. तसेच कामगार कायदे योग्यरित्या अंमलात आणले जावेत. जेणेकरून यंत्रमाग कामगारांचे वर्षानुवर्षे होणारे शोषण संपेल. यासाठी भिवंडी, सोलापूर, इचलकरंजी आणि मालेगाव येथील कामगार वर्षानुवर्षे संघर्ष करत आहेत. मात्र, आजवर आश्वासनांखेरीज काहीही मिळालेले नाही.