नवी मुंबई, ता. २९ (वार्ताहर) : धावत्या रिक्षावर स्टंटबाजीचा जीवघेणा प्रकार करणाऱ्या तरुणासह दोघांविरोधात रबाळे एमआयडीसी पोलिसांनी ताब्यात घेतले आहे. या घटनेचा व्हिडिओ व्हायरल झाल्यानंतर ही कारवाई केली आहे.
भर पावसात धावत्या रिक्षाच्या मागे उभे राहून एका तरुणाने स्टंटबाजी केली होती. रिक्षाच्या मागून येणाऱ्या एका वाहनचालकाने याचे चित्रण मोबाईलवरून केले होते. हा व्हिडिओ सोशल मीडियावर व्हायरल झाल्यानंतर पोलिसांनी रिक्षावर स्टंटबाजी करणाऱ्या तरुणाचा शोध घेतला होता. रविवारी मध्यरात्री दीडच्या सुमारास ठाणे-बेलापूर मार्गावर दिघा येथील मुकुंद कंपनीसमोर हा प्रकार घडल्याची माहिती पोलिसांना मिळाली होती. त्यानुसार पोलिसांनी रिक्षाच्या क्रमांकांवरून चालक अमितकुमार घुरीयाला (२२) ताब्यात घेतले. त्याच्या चौकशीतून आकाश ऊर्फ कल्लू चौहानने (२२) स्टंटबाजी केल्याचे उघड झाले. तर त्यांचा साथीदार ओमकार बाप्रप (२२) यालाही रबाळे एमआयडीसी पोलिसांनी ताब्यात घेतले. त्यांच्याविरोधात मोटार वाहन कायदा कलम १८४ नुसार गुन्हा दाखल केला आहे. या तिघांना नोटीस बजावत सोडून दिल्याची माहिती रबाळे एमआयडीसी पोलिसांनी दिली.