काळू नदीवरील पुलाला भेगा
मुरबाड, ता. २९ (बातमीदार) : शहापूर लेनाडमार्गे मुरबाड-कर्जत या राष्ट्रीय महामार्गावरील काळू नदीवर बांधलेल्या पुलाला भेगा पडल्याचा प्रकार उघडकीस आला आहे. यामुळे येथील वाहतुकीला धोका निर्माण झाला आहे. कळगाव गावाच्या शेजारी काळू नदीवर चार वर्षांपूर्वी हा पूल बांधण्यात आला आहे. या पुलाच्या दोन भाग जोडणाऱ्या सांध्यामध्ये भल्या मोठ्या भेगा पडल्या आहेत.

नाशिक-मुंबई महामार्गाहून शहापूरपासून सुरू होणारा हा मार्ग जेएनपीए बंदरापर्यंत जातो. महाराष्ट्र राज्य रस्ते विकास महामंडळाने या रस्त्याचे काम कंत्राटदारामार्फत केले; मात्र हे काम बऱ्याच ठिकाणी अपूर्ण असल्याचे स्थानिकांचे म्हणणे आहे. येथील ग्रामस्थ भास्कर पाटील यांनी सांगितले, की मुरबाड-शहापूर रस्त्यावर कळगाव येथे नदीवरील पुलामुळे शहापूरकडे जाणारे अंतर कमी आहे; तसेच या परिसरातील अनेक लोक कामानिमित्त मुरबाडला दररोज ये-जा करतात; मात्र या पुलाच्या मध्यभागी भेगा पडल्याने मोठा अपघात होण्‍याची शक्यता आहे. दरम्यान, गेल्या काही वर्षांपासून या रस्त्याचे काम सुरू अपूर्ण आहे. या रस्त्याचे काम निकृष्ट दर्जाचे झाले आहे. त्यातच काळू नदीवर असलेल्या पुलावर रस्त्यावरील सिमेंट निघून गेल्याने मोठा खड्डा पडला आहे, त्यामुळे याठिकाणी अपघात होण्याची शक्यता असल्याने तातडीने या फुलाची दुरुस्ती करणे गरजेचे आहे, अशी प्रतिक्रिया आसोळे येथील ग्रामस्थ शंकर मारुती कोर यांनी दिली.