बुद्धिबळ स्पर्धेत उरणच्या आराध्या पुरोची राज्यस्तरीय निवड
उरण, ता. २९ (वार्ताहर) ः रायगड येथे रविवारी (ता. २७) पार पडलेल्या १५ वर्षांखालील वयोगटातील बुद्धिबळ निवड स्पर्धेत उरण तालुक्यातील आराध्या पुरो (वय नऊ) हिने उल्लेखनीय कामगिरी केली आहे. यासाठी तिची राज्यस्तरीय स्पर्धेसाठी आपले स्थान निश्चित केले आहे.
आराध्याने आपल्या बुद्धिमत्तेच्या जोरावर स्पर्धेतील अनेक फेऱ्या आत्मविश्वासाने पार करीत अंतिम फेरी गाठली आणि विजेतेपद पटकावले. ऑगस्ट महिन्यात छत्रपती संभाजीनगर येथे होणाऱ्या महाराष्ट्र राज्य बुद्धिबळ स्पर्धेसाठी थेट निवड मिळवली. तिच्या या यशाबद्दल आयोजकांतर्फे तिला ट्रॉफी आणि रोख स्वरूपातील बक्षीस देऊन गौरविण्यात आले. आराध्याच्या या यशामागे तिची मेहनत, अभ्यास आणि आई-वडिलांचे प्रोत्साहन यांचा मोलाचा वाटा आहे. तिच्या कुटुंबीयांनी तिच्या प्रत्येक टप्प्यावर साथ दिली आणि तिच्यातील क्षमता फुलवण्यासाठी सतत प्रेरणा दिली. उरणवासीयांकडून आराध्याच्या यशाचे कौतुक करण्यात येत आहे. अनेक स्थानिक संस्था, शाळा व खेळप्रेमी नागरिकांनी तिच्या यशाबद्दल आनंद व्यक्त करीत पुढील वाटचालीसाठी शुभेच्छा दिल्या आहेत.
आराध्या पुरो हिचे हे यश उरण तालुक्यासाठी सन्मानाची बाब असून, येत्या राज्यस्तरीय स्पर्धेत ती आणखी उज्ज्वल कामगिरी करेल, अशी अपेक्षा सर्वच स्तरांतून व्यक्त केली जात आहे.