सीबीआय क्लोजर रिपोर्टप्रकरणी अभिनेत्री रिया चक्रवर्तीला नोटीस
सुशांतसिंह राजपूत मृत्यू प्रकरण

सकाळ वृत्तसेवा
मुंबई, ता. २९ ः अभिनेता सुशांतसिंह राजपूत मृत्यू प्रकरणात केंद्रीय अन्वेषण विभागाने (सीबीआय) दाखल केलेल्या क्लोजर रिपोर्टसंदर्भात दंडाधिकारी न्यायालयाने मूळ तक्रारदार अभिनेत्री रिया चक्रवर्तीला नोटीस बजावली आहे.
सीबीआयकडून मार्च २०२५मध्ये क्लोजर रिपोर्ट न्यायालयात सादर केला होता. मूळ तक्रारदारसह सर्व संबंधितांना नोटीस बजावण्याचे  आदेशही अतिरिक्त मुख्य न्यायदंडाधिकारी  आर. डी. चव्हाण यांनी दिले. त्यानुसार मूळ तक्रारदार रिया चक्रवर्तीला नोटीस बजावण्यात आली असून पुढील सुनावणी १२ ऑगस्टला ठेवली आहे.  सुशांतला बायपोलर डिसऑर्डर असल्याचे वैद्यकीय चाचणीत निष्पन्न झाले होते. त्यामुळे त्याच्यावर मानसिक आरोग्याशी संबंधित समस्यांवरदेखील उपचार सुरू होते. त्याच वेळी सुशांतच्या दोन बहिणी आणि डॉ. तरुण कुमार यांनी सुशांतला चुकीची औषध दिल्याचा, त्याला आत्महत्येसाठी प्रवृत्त केल्याचा, दिशाभूल केल्याचा आणि गुन्हेगारी षड्यंत्र रचल्याचा आरोप रियाने तक्रारीत केला होता.  याप्रकरणी सीबीआयने तब्बल चार वर्षांनी क्लोजर रिपोर्ट दाखल केला आहे. त्या अहवालानुसार रियाने दाखल केलेल्या तक्रारीत सीबीआयला काहीही संशयास्पद आढळले नाही आणि त्यांनी तपास बंद करण्याचा निर्णय घेतल्याचे नमूद केले आहे.
...
दोन क्लोजर रिपोर्ट सादर
अभिनेता सुशांत सिंह राजपूतचा मृतदेह १४ जून २०२० रोजी त्याच्या निवासस्थानी आढळून आला होता. मुंबई पोलिसांनी ही आत्महत्या असल्याचे प्रथम सांगितले होते; मात्र सुशांतच्या मृत्यूबाबत संशय व्यक्त केल्यानंतर प्रकरणाचा तपास सीबीआयकडे सोपवण्यात आला होता. याप्रकरणी सीबीआयने दोन क्लोजर रिपोर्ट सादर केले आहेत. सुशांतला आत्महत्येसाठी प्रवृत्त केल्याच्या त्याच्या वडिलांनी केलेल्या आरोपाप्रकरणी सीबीआयचा पहिला क्लोजर रिपोर्ट दाखल केला होता, तर दुसरा क्लोजर रिपोर्ट हा रियाने सुशांतच्या बहिणींविरुद्ध केलेल्या तक्रारीशी संबंधित आहे.