श्रीवर्धन-भिवंडी एसटीचा अपघात
माणगाव, ता. २९ (वार्ताहर) : मुंबई-गोवा महामार्गावर रातवड गावाशेजारी मंगळवारी (ता. २९) सायंकाळी पाच वाजण्याच्या सुमारास एसटीचा अपघात झाला. यामध्ये नऊ प्रवासी जखमी झाले. या बसमधून एकूण २४ प्रवासी प्रवास करीत होते. अपघातातील जखमींवर माणगांव उप जिल्हा रुग्णालयात उपचार सुरू आहेत.

श्रीवर्धन-भिवंडी ही एसटी सायंकाळी ५ वाजता रातवड हद्दीमध्ये आली असता, बसवरील चालकाचा ताबा सुटल्याने ही बस रस्त्याशेजारील शेतात उलटली. यामध्ये बसमधील निकिता जितेंद्र पवार (वय ३०), जितेंद्र संजय पवार (वय ३५), जिनल जितेंद्र पवार (वय ९), महेश मारुती जाधव (वय २४), रोहित पांडे (वय ३०), माया सुनील जाधव (वय ५५), आशा महेश जाधव (वय २६), अमृता महेश जाधव (वय ८), मयूरेश महेश जाधव (वय ३) हे प्रवासी जखमी झाली आहेत. या अपघाताची माहिती मिळताच माणगांव पोलिस ठाण्याचे पोलिस निरीक्षक निवृत्ती बोराडे, सहाय्यक पोलिस निरीक्षक नरेंद्र बेलदार तसेच पोलिस कर्मचारी यांनी तत्काळ घटनास्थळी धाव घेऊन जखमी प्रवाशांना माणगांव उप जिल्हा रुग्णालयात उपचारासाठी दाखल केले.