महिला सरपंचांचा आत्महत्येचा प्रयत्न

पनवेल, ता. २९ (बातमीदार) : चिखले गावातील गायरान जमीन प्रकरणात दीर्घकाळ न्याय न मिळाल्याने सरपंच दीपाली तांडेल आणि त्यांचे पती दत्तात्रय तांडेल यांनी मंगळवारी (ता. २९) राहत्या घरात विषप्राशन करून आत्महत्येचा प्रयत्न केला. या घटनेमुळे गावात एकच खळबळ उडाली असून, तणावाचे वातावरण निर्माण झाले आहे. तांडेल दाम्पत्यावर पनवेल उप जिल्हा रुग्णालयात उपचार सुरू आहेत.

तांडेल दाम्पत्याने गायरान जमीनप्रकरणी न्याय मिळावा म्हणून १७ मार्चपासून उपोषण सुरू केले होते. सलग १२ दिवसांच्या उपोषणानंतर प्रांताधिकाऱ्यांनी आठ दिवसांत बैठक घेऊन प्रश्न सोडवण्याचे आश्वासन दिले; मात्र त्यानंतरही कोणताच निर्णय झाला नाही. ग्रामपंचायतीच्या नावावर असलेल्या गायरान जमिनीवर बेकायदा साठे करार करून मोठ्या प्रमाणात माती उत्खनन झाले. पाच महिन्यांपासून पोलिस व महसूल विभागाकडे तक्रारी करूनही आरोपींवर कोणतीही कारवाई झाली नाही. या गैरव्यवहारात गावचे तत्कालीन सरपंच आणि ग्रामसेवक यांचा सहभाग असल्याचा आरोप तांडेल दाम्पत्याने केला आहे. गावातील गैरव्यवहार करणाऱ्यांवर कारवाईची मागणी वारंवार करूनही प्रशासनाने दुर्लक्ष केल्यानेच हे पाऊल उचलावे लागल्याचे तांडेल दाम्पत्याने सांगितले.