उत्कृष्ट कामगिरीला शाबासकीची थाप
रायगड पोलिस दलातील अधिकारी, कर्मचाऱ्यांचा गौरव
अलिबाग, ता. ३० (वार्ताहर)ः पोलिस विभागात उत्कृष्ट कामगिरी करणाऱ्या सात अधिकाऱ्यांसह १८ पोलिस कर्मचाऱ्यांना जिल्हा पोलिस अधीक्षकांच्या हस्ते गौरविण्यात आले. या पुरस्कारांमध्ये हत्येचा कौशल्यपूर्ण तपास, सीसीटीएनएस, मुद्देमाल निर्गती, एनडीपीएस मुद्देमाल जप्ती तसेच पोलिस कर्तव्य मेळावा, अशा पाच विभागांत कौशल्यपूर्ण कामांचा समावेश होता.
शिघेर येथे नाकाबंदीदरम्यान संशयिताला ताब्यात घेऊन आरोपींकडून तीन किलो चरस जप्त करण्यात आला होता. या कामगिरीसाठी स्थानिक गुन्हे शाखेचे सहाय्यक पोलिस निरीक्षक भास्कर जाधव, विजयकुमार देशमुख, हरी मेंगाळ आणि इतर चार पोलिस कर्मचाऱ्यांचा गौरव केला. पोलादपूर येथील हत्येच्या प्रकरणाचा कौशल्यपूर्ण तपास करण्यासाठी सहाय्यक पोलिस निरीक्षक आनंद रावडे, सहाय्यक फौजदार रवींद्र सर्णेकर, हवालदार संग्राम बामणे, तुषार सुतार, पोलिस नाईक अनुजित शिंदे, शिपाई शीतल बनसोड, सौरभ जाधव यांनी विशेष मेहनत घेतली. त्यांना २५ हजार रोख आणि प्रशस्तिपत्रक देऊन जिल्हा पोलिस अधीक्षक आंचल दलाल यांनी गौरवित केले.
---------------------------
‘या’ विभागांची उत्कृष्ट कामगिरी
सीसीटीएनएस : मांडवा सागरी पोलिस ठाण्याच्या शिपाई अक्षता दांडेकर, नेरळ पोलिस ठाण्याच्या हवालदार लतिका कदम.
मुद्देमाल निर्गती : नेरळ पोलिस ठाण्याचे उपनिरीक्षक तुळशीराम भिंगारे, तळा पोलिस ठाण्याच्या हवालदार सीमा चांदोकर.
कर्तव्य मेळावा : खोपोलीचे सहाय्यक पोलिस निरीक्षक मनोज ठाकरे, म्हसळ्याचे पोसई ज्ञानेश्वर येडवले, नागोठण्याचे पोलिस नाईक समीर पाटील, दादर सागरीचे पोलिस नाईक आर. आर. कुथे, श्वानपथकाचे हवालदार एस. एल. खैरे, तसेच पोलिस नाईक एस. एस. बलकावडे यांनी उत्कृष्ट कामगिरी केली आहे.