हप्त्याची मागणी करत लांबवला मोबाईल
ठाणे, ता. ३० ः पाचशे रुपयांचा हप्ता दे, नाहीतर दुकानाची तोडफोड करीन, अशी धमकी देत दुकानदाराचा मोबाईल खेचून पळून जाणाऱ्या अजय वायकर याच्याविरोधात वागळे इस्टेट पोलिस ठाण्यात गुन्हा दाखल केला आहे. चोरीला गेलेल्या मोबाईलची किंमत १० हजार रुपये असल्याचे तक्रारीत नमूद केले आहे. हा प्रकार मंगळवारी (ता. २९) दुपारी घडला. श्रीनगर येथील भाविन ठक्कर यांचे ज्ञानसाधना महाविद्यालयाजवळ हरिओम झेरॉक्स नावाचे स्टेशनरीचे दुकान आहे. मंगळवारी दुपारी ठक्कर यांच्या दुकानात वायकर ही व्यक्ती आली. त्याने ठक्कर यांना म्हटले, की तू मला चांगला ओळखतोस. माझ्यावर अनेक गुन्हे दाखल आहेत, मला पाचशे रुपये हप्ता दे, नाहीतर तुझ्या दुकानाची तोडफोड करीन, अशी धमकी त्याने दिली. याच दरम्यान ठक्कर यांनी हप्ता देण्यास नकार दिल्याने तो आजूबाजूच्या दुकानांमध्येदेखील हप्ता मागण्यास गेला होता; परंतु कोणीही हप्ता दिला नाही. याचा राग मनात धरून तो हातात बांबू घेऊन पुन्हा ठक्कर यांच्या दुकानात आला. तसेच त्यांना बांबूचा धाक दाखवत ठक्कर यांच्या हातातील मोबाईल जबरदस्तीने खेचून पळून गेला.