विद्यार्थ्यांसाठी पोलिसांचं मार्गदर्शन शिबिर
तळा, ता. ३० (बातमीदार) ः विभाग शिक्षण प्रसारक मंडळाचे गो. म. वेदक विद्यामंदिर येथे माणगावच्या सहाय्यक पोलिस निरीक्षक मीरा लाड यांनी विद्यार्थी सुरक्षा, महिला, रस्ते वाहतुकीचे नियम, मोबाईलचा वापर, सायबर सुरक्षा व कायदा, ‘गुड टच-बॅड टच’बाबत मार्गदर्शन केले.
याप्रसंगी पोलिस भगिनी पूजा गावडे, ऋतुजा बोराडे, रसिका मुकणे, महेश मडवी, विद्यामंदिराचे पर्यवेक्षक महादेव लोकरे आदी मान्यवर उपस्थित होते. सहायक मीरा लाड म्हणाल्या की, विद्यार्थ्यांनी अल्पवयीन काळात वाहन चालवू नये, आपण सत्य, अहिंसा, प्रामाणिकपणा यासारखी नैतीक मूल्य जपावे, आपले जवळचे नातेवाईक किंवा इतर कोणाकडूनही काही त्रास होत असेल, तर आपल्या तळा तालुक्यातील पोलिस ठाणे, हेल्पलाइन नंबर किंवा दामिनी पथकास माहिती द्यावी, असे आवाहनही त्यांनी केले.
विद्यार्थिनींची छेडछाड, रॅगिंग, अमली पदार्थाचे दुष्परिणाम, सायबर गुन्हे या सर्व प्रकारच्या घटना आज समाजामध्ये घडताना दिसून येत आहेत. अशावेळी वेळीच मदत मिळाल्यास भविष्यात होणारी हानी थांबवण्यास मदत होते. शाळेमधील लहान मुले, महाविद्यालयीन युवक-युवती यांच्या समस्याचे निराकरण आणि सुरक्षेसाठी मदत करणे गरजेचे आहे. त्यामुळे पोलिस दिदीची नेमणूक करण्यात आली असून, कोणी त्रास दिला तर ११२ नंबरवर तत्काळ माहिती द्यावी, असेही लाड यांनी सांगितले.