डोंबिवलीत बेकायदा बांधकामावर हातोडा
कुंभारखाणपाडा, सरोवरनगर येथे कारवाई
सकाळ वृत्तसेवा
डोंबिवली, ता. ३१ : डोंबिवली पश्चिमेतील ह प्रभाग क्षेत्रातील कुंभारखाणपाडा, सरोवरनगर येथील बेकायदा चाळीवर सहाय्यक आयुक्त राजेश सावंत यांच्या तोडकाम पथकाने हातोडा चालवला. भरपावसात ही कारवाई केली असून, याआधीदेखील याच परिसरात भूमाफियांनी बेकायदा बांधकाम केली होती. डोंबिवली पश्चिमेला खाडीकिनारी परिसरात भूमाफिया बेकायदा बांधकाम उभारत आहेत. चाळीचे बांधकाम मोठ्या प्रमाणात होत आहे.

पावसाळ्यात अधिकाऱ्यांचे लक्ष नाही, असा विचार करून भूमाफियांनी कुंभारखाणपाडा, सरोवरनगर खाडीकिनारा परिसरात खासगी, सरकारी जमिनींवर बेकायदा चाळी उभारण्याचा सपाटा लावला होता. या चाळींच्या ठिकाणी पोहोच रस्ते नाहीत. पाणीपुरवठा, मलनिस्सारणाची कोणतीही सुविधा नसताना या चाळींची उभारणी केली होती. प्रभागात फिरत असताना सहाय्यक आयुक्त राजेश सावंत यांना या भागात नव्याने बेकायदा चाळी उभारल्या जात असल्याचे निदर्शनास आले. त्यांनी घटनास्थळी जाऊन पाहणी केली. १० खोल्यांच्या या चाळी बेकायदा असल्याची खात्री पटल्यावर आवश्यक विहित प्रक्रिया पार पाडून सहाय्यक आयुक्त सावंत, अधीक्षक अरूण पाटील यांनी तोडकाम पथक, जेसीबीच्या सहाय्याने सरोवरनगर, कुंभारखाणपाडा भागातील बेकायदा चाळी भुईसपाट केल्या.