नव्या कृती पुस्तिकेने शिक्षणाचे नवे दालन
पालघरचा नवा उपक्रमः निपुण पालघर गुणवत्ता विकास अभियान
पालघर, ता. ३० (बातमीदार) ः जिल्हा परिषदेच्या शिक्षण विभाग प्राथमिकेमार्फत राबविलेल्या निपुण पालघर, गुणवत्ता विकास अभियान अंतर्गत तयार करण्यात आलेल्या कृती पुस्तिकेचा प्रकाशन सोहळा गुरुवारी (ता. ३१) जननायक बिरसा मुंडा सभागृह जिल्हा परिषद पालघर येथे पार पडले. मुख्य कार्यकारी अधिकारी मनोज रानडे यांच्या अध्यक्षतेखाली प्राथमिक शिक्षणाधिकारी सोनाली मातेकर, डाएटचे प्राचार्य संभाजी भोजने, जिल्हा समन्वयक तानाजी डावरे तसेच जिल्ह्यातील विविध शाळांतील शिक्षकांच्या उपस्थितीत हा कार्यक्रम झाला.
कार्यक्रमाचे प्रास्ताविक सोनाली मातेकर यांनी सादर केले. मनोज रानडे म्हणाले की, जिल्ह्याची वैशिष्ट्ये अधोरेखित करणारी, समजेल अशा भाषेत तयार केलेली ही पुस्तिका म्हणजे एक अभिनव संकल्पना आहे. कमी वेळात शिक्षकीय कष्टातून तयार झालेली ही पुस्तिका विद्यार्थ्यांच्या सर्वांगीण विकासाला चालना देणारी आहे. पदोन्नती आणि इतर लाभ तर मिळतीलच, पण खरे समाधान तुमच्या कामातून मिळते. तुमचे काम मनापासून करा, मी माझी जबाबदारी पूर्ण करेन, अशी ग्वाही त्यांनी यावेळी दिली.
या अभियानाचा उद्देश इयत्ता दुसरी ते आठवीच्या विद्यार्थ्यांमध्ये पायाभूत साक्षरता व संख्याज्ञान विकसित करणे हा असून एक ऑगस्ट ते ३० ऑक्टोबर या कालावधीत ४५ दिवसांचे साचेबद्ध कृती कार्यक्रम जिल्हा परिषद शाळांमध्ये राबविणार आहेत.
या कृती पुस्तिकेत भाषा, गणित आणि इंग्रजी या विषयांतील वाचन, लेखन, संख्याज्ञान, गणितीय क्रिया यावर आधारित एकूण १३५ कृती प्रति इयत्ता दिल्या आहेत. वर्गशिक्षकांनी दररोज तीन कृती वर्गात घेऊन विद्यार्थ्यांना दर्जेदार शिक्षण देणे अपेक्षित आहे. यासाठी विद्यार्थ्यांना घरी गृहपाठही दिला जाणार असून, पालकांचाही सहभाग अपेक्षित आहे. या अभियानातून प्रत्येक शाळा, केंद्र व तालुक्याच्या शैक्षणिक प्रगतीचा आढावा घेता येणार असून, यु-ट्यूब लिंक, क्यूआर कोड, शिक्षण पेट्यांचा वापर यामुळे शिक्षण अधिक उपयुक्त, जिज्ञासू व आनंददायी होणार आहे.
निपुण पालघर अभियान आणि कृती पुस्तिका हे उपक्रम रचनात्मक शिक्षणाकडे वाटचाल घडवणारे ठरणार असून, यामुळे जिल्ह्यातील विद्यार्थ्यांची गुणवत्तात्मक प्रगती होईल, असा विश्वास शिक्षण विभागाने व्यक्त केला आहे.

फोटो निपुण पालघर कृतिपुस्तिका प्रकाशन