मोहन भागवतांबद्दलचा अटकेचा दावा
न्यायालयाने फेटाळला  
सकाळ वृत्तसेवा
मुंबई, ता. १ : राष्ट्रीय स्वयंसेवक संघाचे आरएसएस सरसंघचालक मोहन भागवत यांना २००८च्या मालेगाव बॉम्बस्फोट प्रकरणात अटक करण्याचे आदेश दिले होते, असा दावा करणारे माजी एटीएस अधिकारी मेहबूब मुजावर यांचे विधान विशेष न्यायालयाने फेटाळले आहे. न्यायालयाने हे विधान आरोपींचा छळ आणि राजकीय दबाव दर्शवण्यासाठी सादर केले असल्याचे निरीक्षण नोंदवले आहे.
न्यायाधीश ए. के. लाहोटी यांनी आपल्या निकालात म्हटले आहे, की मुजावर यांनी केलेल्या दाव्याला कोणताही पुरावा नाही. मुजावर यांनी असाही दावा केला होता, की बेकायदा आदेशाला नकार दिल्याने त्यांना एका खोट्या गुन्ह्यात अडकवण्यात आले.
याशिवाय, याच खटल्यातील एका साक्षीदाराने एटीएस अधिकाऱ्यांनी आपल्याला उत्तर प्रदेशचे मुख्यमंत्री योगी आदित्यनाथ आणि इतर काही आरएसएस कार्यकर्त्यांची नावे घेण्यास दबाव टाकत छळ केल्याचेही सांगितले होते; मात्र या साक्षीदाराने नंतर आपला जबाब बदलल्यामुळे न्यायालयाने हे विधानही अमान्य केले.