नवी मुंबईत चार नव्या सहाय्यक पोलिस आयुक्तांची नियुक्ती; दोन अधिकाऱ्यांची बदली
नवी मुंबई, ता. १ (वार्ताहर) : राज्याच्या गृह विभागाने गुरुवारी (ता. ३१) राज्यातील ६५ पोलिस उपअधीक्षक/सहाय्यक पोलिस आयुक्तांच्या केलेल्या बदल्यांमध्ये, नवी मुंबई पोलिस आयुक्तालयात चार नवीन सहाय्यक पोलिस आयुक्तांची नियुक्ती करण्यात आली आहे. त्याच वेळी, नवी मुंबईतील दोन सहाय्यक पोलिस आयुक्तांची इतर ठिकाणी बदली करण्यात आली आहे.
नवी मुंबईत रुजू होणाऱ्या नवीन अधिकाऱ्यांमध्ये विक्रम रमाकांत कदम (उपविभागीय पोलिस अधिकारी, खालापूर), राहुल रावसाहेब धस (उपविभागीय पोलिस अधिकारी, फलटण, सातारा), विजय नथू चौधरी (अपर पोलिस अधीक्षक, लाचलुचपत प्रतिबंधक विभाग, पुणे) आणि योगेश अशोकराव गावडे (सहाय्यक पोलिस आयुक्त, मुंबई शहर) यांचा समावेश आहे. या बदल्यांमुळे एक पोलिस उपआयुक्त (बेलापूर परिमंडळ-२) व दोन सहाय्यक पोलिस आयुक्तांची (रबाळे विभाग व खारघर विभाग) या पदांसाठी अधिकाऱ्यांची सोय झाली आहे. नवी मुंबईचे पोलिस आयुक्त मिलिंद भारंबे यांनी लवकरच या अधिकाऱ्यांच्या अंतर्गत बदल्या केल्या जातील, असे सांगितले आहे.
या बदल्यांमध्ये नवी मुंबईतून पोर्ट विभागाचे सहाय्यक पोलिस आयुक्त विशाल वसंत नेहूल यांची रायगडमधील खालापूर येथे उपविभागीय पोलिस अधिकारी म्हणून बदली झाली आहे, तर डायल ११२ कार्यालयातील सहाय्यक पोलिस आयुक्त प्रदीप गिरिजानाथ तिदार यांची मुंबईतील महाराष्ट्र सायबर कार्यालयात पोलिस उपअधीक्षकपदी बदली झाली आहे.