तपास यंत्रणांनी सर्व बाजूने तपास केला नाही
स्फोटामागे सिमीचा हात असल्याचा दावा फेटाळताना न्यायालयाचे निरीक्षण
सकाळ वृत्तसेवा
मुंबई, ता. १ : सप्टेंबर २००८ मध्ये झालेल्या मालेगाव बॉम्बस्फोटाच्या मागे स्टुडंट्स इस्लामिक मुव्हमेंट ऑफ इंडिया (सिमी) या बंदी घातलेल्या संघटनेचा हात असल्याचा आरोपींचा दावा विशेष एनआयए न्यायालयाने फेटाळला आहे, मात्र या प्रकरणाचा तपास करताना तपास यंत्रणांनी प्रत्येक बाजूने तपास केला नाही, असे निरीक्षण न्यायालयाने नोंदवले.
विशेष न्यायालयाचे न्यायाधीश ए. के. लाहोटी यांनी आपल्या १,०३६ पानांच्या निकालात म्हटले आहे की, बॉम्बस्फोटाचे ठिकाण सिमीच्या कार्यालयाजवळ असतानाही, तपास यंत्रणा सिमीच्या सहभागाची शक्यता तपासण्यात अपयशी ठरली. तत्कालीन तपास अधिकारी मोहन कुलकर्णी यांनी चौकशीत हे मान्य केले की, स्फोटाच्या परिसरात सिमीचे कार्यालय होते. तरीही, त्यांनी सिमीचे कार्यालय त्या वेळी कार्यरत होते का? किंवा त्यांचे सदस्य तिथे उपस्थित होते का?, याची चौकशी केली नाही.
न्यायालयाने हे स्पष्ट केले की, जरी सिमीचा सहभाग नसल्याची शक्यता तपास यंत्रणांना वाटली असली तरी, काही तथ्ये समोर आल्यास त्या दिशेने तपास करणे आवश्यक होते. त्यामुळे आरोपींच्या वकिलांनी केलेला सिमीच्या सहभागाचा दावा न्यायालयाने फेटाळला असला तरी, तपास यंत्रणांच्या कार्यपद्धतीवर प्रश्नचिन्ह निर्माण झाले आहे; मात्र सिमीच्या कार्यकर्त्यांचा स्फोटात सहभाग असल्याचा कोणताही ठोस पुरावा नसल्याने न्यायालयाने आरोपींचा दावा फेटाळून लावला.