पालघर, ता. २ (बातमीदार) : राष्ट्रीय शैक्षणिक धोरणाच्या पाचव्या वर्धापनदिनानिमित्त ‘अखिल भारतीय शिक्षा समागम’अंतर्गत पालघर जिल्ह्यात विशेष गरजा असलेल्या विद्यार्थ्यांसाठी तालुकास्तरीय वैद्यकीय मूल्यांकन शिबिरे आणि सहाय्यक साहित्यवाटप आयोजित करण्यात आले.

पालघर जिल्हा परिषदेचे मुख्य कार्यकारी अधिकारी मनोज रानडे यांच्या मार्गदर्शनाखाली जिल्हा शल्यचिकित्सक कार्यालय, शिक्षण विभाग व समावेशित शिक्षण शाखेच्या संयुक्त विद्यमाने हा उपक्रम राबविण्यात आला. या शिबिरांद्वारे शेकडो दिव्यांग विद्यार्थ्यांची तपासणी करून त्यांना व्हीलचेअर, कमोड चेअर, सीपी चेअर, श्रवणयंत्र, एम. आर. किट, रोलेटर यांसारख्या साधनांचे वितरण करण्यात आले. या उपक्रमात गटशिक्षणाधिकारी, समन्वयक, आरोग्यतज्ज्ञ व शिक्षण विभागाचे अधिकारी मोठ्या संख्येने सहभागी झाले. या शिबिरांमुळे विशेष गरजा असलेल्या विद्यार्थ्यांना शैक्षणिक संधी आणि आवश्यक सुविधा मिळवून देण्यासाठी महत्त्वपूर्ण पाऊल उचलले गेले, असे आयोजकांनी सांगितले.

महत्त्वाच्या ठिकाणांवरील शिबिरे
पालघर तालुक्यामध्ये मंगळवारी (ता. २९ जुलै) आणि बुधवारी (३० जुलै) ४५ विद्यार्थ्यांना साहित्यवाटप व शापरिया कर्णबधिर विद्यालयात पाच कर्णबधिर आणि १७ मतिमंद विद्यार्थ्यांची तपासणी करण्यात आली. डहाणू तालुक्यात मंगळवारी ३९ विद्यार्थ्यांना सहाय्यक साधनेवाटप, जव्हार आणि मोखाडा येथे बुधवारी अनुक्रमे दहा व चार विद्यार्थ्यांना साहित्यवाटप, वसई तालुक्यात २९ जुलैला स्वामी परिज्ञानाश्रम शैक्षणिक केंद्र येथे ५५ विद्यार्थ्यांची तपासणी, तर तलासरी तालुक्यात गुरुवारी (ता. ३१ जुलै) ५० विद्यार्थ्यांना सहाय्यक साधनेवाटप करण्यात आले.