मोबाईल चोरट्यांचा सुळसुळाट
सकाळ वृत्तसेवा
ठाणे, ता. २ : ठाणे स्थानकांवर मोबाईल चोरट्यांचा सुळसुळाट झाला आहे. एकाच दिवशी दोन प्रकरण घडली असून ठाणे लोहमार्ग पोलिस ठाण्यात गुरुवारी (ता. ३१) गुन्हा दाखल झाला आहे.
लोकल प्रवासात चोरट्याने मुंबई पोलिस शिपायाच्या फोनवरच डल्ला मारल्याची घटना घडली आहे. यामध्ये ३७ हजार रुपये किंमतीचा मोबाईल फोन चोरीला गेल्याची तक्रार नोंदविण्यात आली आहे. प्रशांत बाळू माने असे त्यांचे नाव असून ते वरळी मुख्यालयात पोलिस शिपाई म्हणून कार्यरत आहेत.
प्रशांत माने हे गुरुवारी (ता. ३१) कल्याण येथे काही कामानिमित्त गेले होते. यानंतर ते कल्याण येथून जलद लोकल पकडून निघाले. ठाणे रेल्वे स्थानकावर लोकल येताच मोबाईल चोरीला गेल्याचे त्याचे लक्षात आले. या फोनच्या पाठीमागील कव्हरमध्ये त्यांच्या नावाचे बक्कळ नंबर आणि नवप्रविष्ठा एलए ३ वरळी मुख्यालयाची दुय्यम प्रत असल्याचे त्यांनी सांगितले आहे. याप्रकरणी ठाणे लोहमार्ग पोलिस ठाण्यात गुन्हा दाखल करण्यात आला असून पुढील तपास सुरू आहे.

नोकरीच्या ठिकाणी हजर होण्यासाठी तपोवन एक्सप्रेसने ठाणे रेल्वे स्थानकात संभाजीनगरचा तरुण रात्री उतरला. याचदरम्यान चोरट्याने तरुणाचा मोबाईल फोन लांबवल्याची घटना घडली आहे. याप्रकरणी अक्षय राजपूत याने ठाणे लोहमार्ग पोलिस ठाण्यात गुरुवारी (ता. ३१) गुन्हा दाखल झाला आहे.