महसूल सप्ताहामुळे नागरिकांच्या समस्या सोडवण्यास मदत
अलिबाग, ता. २ (वार्ताहर) ः महसूल सप्ताह नागरिकांच्या दृष्टीने अत्यंत महत्त्वाचा असून, यामुळे त्यांचे अनेक प्रशासकीय प्रश्न मार्गी लागतात. महसूल विभागाच्या या उपक्रमामुळे शासनाची सेवा अधिक जवळून अनुभवता येते, असे प्रतिपादन राज्याच्या महिला व बालविकास मंत्री आदिती तटकरे यांनी महसूल दिनाच्या कार्यक्रमात केले.
हा कार्यक्रम शुक्रवार, १ ऑगस्ट रोजी जिल्हाधिकारी कार्यालयातील नियोजन भवन येथे पार पडला. यावेळी व्यासपीठावर रोजगार हमी योजना, फलोत्पादन व खारभूमी विकास मंत्री भरत गोगावले, जिल्हाधिकारी किशन जावळे, मुख्य कार्यकारी अधिकारी नेहा भोसले, जिल्हा पोलिस अधीक्षक आचल दलाल, अपर जिल्हाधिकारी सुनिल थोरवे आणि इतर मान्यवर उपस्थित होते.
मंत्री आदिती तटकरे म्हणाल्या, राज्य शासनामार्फत ''शासन आपल्या दारी'', ''महाराजस्व अभियान'' यांसारखे उपक्रम राबवले जात आहेत. लवकरच ‘छत्रपती शिवाजी महाराज महाराजस्व अभियान’ देखील सुरू होणार आहे. या उपक्रमांतून नागरिकांशी थेट संवाद साधण्याची संधी मिळणार असून त्यांच्या समस्या तत्काळ सोडवल्या जाणार आहेत. त्यांनी अधिकाऱ्यांना आधुनिक साधनसामुग्रीच्या उपलब्धतेवर भर देण्याचेही आवाहन केले. तर मंत्री भरत गोगावले यांनी सांगितले, की गोरगरीब जनतेला शासनाच्या प्रत्येक योजनेचा लाभ मिळावा, यासाठी अधिकारी-कर्मचाऱ्यांनी जनतेसाठी कळकळीने काम केले पाहिजे. शासन हे लोकांचे आहे, हे प्रत्येकाने लक्षात ठेवावे.