धारावीतील अंतर्गत रस्‍त्‍यांची दुरवस्‍था
गणेशोत्‍सवापूर्वी दुरुस्‍ती करण्याची मागणी
धारावी, ता. २ (बातमीदार) : गणपतीचे आगमन जवळ येत आहे. त्यामुळे धारावीतील मंडळाची धावपळ सुरू झाली आहे. यंदाही खड्ड्यांमधूनच श्री गणरायाचे आगमन होणार का, असा प्रश्न मंडळांना पडला आहे. त्यामुळे धारावीतील अंतर्गत रस्ते व विभागातील अंतर्गत छोटे रस्ते पालिकेने लवकरात लवकर दुरुस्त करून घ्यावेत, अशी मागणी मंडळांचे पदाधिकारी व कार्यकर्ते करीत आहेत.
धारावी मुख्य रस्त्यावरील शेठ वाडी येथे श्री गणेशाची आणि देवीची गेल्‍या अनेक वर्षांपासून स्थापना केली जात आहे. येथील रस्त्यावरील पेव्हर ब्लॉक जागोजागी निखळले आहेत. त्यामुळे वस्तीतील वाटेवरून चालणे व वाहने नेणे पावसाळ्यात कठीण होऊन बसले आहे. रस्त्यावरून चालताना अनेकांचे पाय मुरगळणे, दुखापत होणे असे प्रकार घडत आहेत. रुग्ण, ज्येष्ठ नागरिक, लहान मुले, गरोदर माता यांना तर रस्त्यावरून जाताना मोठा त्रास सहन करावा लागत आहे. त्‍यामुळे वस्तीतील रहिवासी संताप व्यक्त करीत आहेत.
शेठ वाडीमधील आदर्श क्रीडा सार्वजनिक नवरात्रोत्सव मंडळाने गेल्‍या दोन वर्षांपासून पालिकेशी रस्ता दुरुस्ती व नूतनीकरणासाठी पत्रव्यवहार केला आहे. पालिकेच्या ग उत्तर विभाग कार्यालयात अधिकाऱ्यांना प्रत्यक्ष भेटून पाठपुरावा करीत असल्याचे मंडळाचे अध्यक्ष अजिंक्य सोनवणे व सचिव अनिकेत शिंदे यांनी सांगितले.