‘एसटीचे खासगीकरण बंद करा’
काँग्रेसचे खासगीकरणाविरोधात आंदोलन
सकाळ वृत्तसेवा
ठाणे, ता. २ : एसटी महामंडळ बसस्थानकांना सार्वजनिक-खाजगी भागीदारी मॉडेलअंतर्गत दीर्घ मुदतीच्या कालावधीसाठी भाडेतत्त्वावर देऊन खाजगीकरणाचा घाट घातला जात आहे. याविरोधात ठाणे कॉंग्रेस आक्रमक झाली आहे. एसटी महामंडळाच्या या धोरणाविरोधात रेल्वे स्थानक येथे कॉंग्रेसने आंदोलन केले. एसटीचे खासगीकरण बंद करा, एसटीच्या मोक्याच्या जागा हडप करू नका, अशा घोषणा आंदोलनकर्त्यांनी दिल्या.
ठाणे एसटी आगार खाजगीकरणासह खड्ड्यांचे साम्राज्य, स्वच्छतागृहांची दुरावस्था, बसण्यासाठी योग्य व्यवस्था नसणे, महामंडळांच्या कार्यालयाची दुरावस्था याकडे एसटी प्रशासनाचे ठाणे काँग्रेसचे अध्यक्ष विक्रांत चव्हाण यांनी लक्ष वेधले. यावेळी काँग्रेसच्या वतीने सिमेंट मिक्सर आणून काँक्रीटीकरण करत आगारातील खड्डे बुजविले.
यावेळी बोलताना चव्हाण म्हणाले की, ठाणे आगाराची अत्यंत दुरावस्था झाली आहे. आतापर्यंत शहरात कोट्यावधी रुपये काँक्रिटीकरण व डांबरीकरणावर खर्च करण्यात आले. शहरातील बस स्थानक दुर्लक्षित का? एसटी स्थानके भाडेतत्वावर देत खाजगीकरणासाठी पुढाकार घेणारे परिवहन मंत्री त्यांच्याच शहरात एसटी प्रवाशांना मूलभूत सोयी-सुविधा पुरवू शकत नाही ही खेदाची बाब आहे, असे त्यांनी म्हंटले आहे. याप्रसंगी काँग्रेसचे मुख्य प्रवक्ते राहुल पिंगळे, हिंदुराव गळवे यांच्यासह सर्व स्तरातील पदाधिकारी व कार्यकर्ते मोठया संख्येने उपस्थित होते.