दहीहंडी दिवशी पाहायला मिळणार थरांचा थरार
गोविंदा पथकांचा ठिकठिकाणी सराव सुरू
प्रभादेवी, ता. २ (बातमीदार) : मुंबईत ठिकठिकाणी दहीहंडी सराव सुरू झाला आहे. मुंबईतील नामांकित गोविंदा विक्रमी तीन ते चार एक्क्यांचा थर लावण्याचा कसून सराव करीत असून, काळजाचा ठोका चुकविणारा गोविंदांचा हा थरांचा थरार लवकरच मुंबईकरांना अनुभवायला मिळणार आहे.
मुंबईत बरेचशा गोविंदा पथके नावाजलेली असून, त्यांचा सात ते आठ थरांचा सराव असतो. त्यामुळे दहीहंडीच्या दिवशी रोमहर्षक उत्कंठा वाढवणारा थरांचा विक्रम मुंबईवासीयांना पाहायला मिळणार आहे. ठिकठिकाणी सराव शिबिराला सुरुवात झाली असून, गोविंदा पथकांचा एक्‍क्‍यावर एक्‍का लावण्याचा प्रयत्न गोविंदा पथकांकडून होत असल्याचे चित्र दादर, प्रभादेवीत पाहावयास मिळत आहे. तर जोगेश्वरी येथील आर्यन्स गोविंदा पथकाने यावर्षी जोरदार तयारी सुरू केली असून, यंदा नऊ थरांचा प्रयत्न करणार असल्याचे गोविंदा पथकाचे निखिल नांदगावकर यांनी सांगितले. गेल्या वेळेस प्रो गोविंदा शिबिरात आर्यन गोविंदा पथकाने स्पॅनिश पद्धतीने फोर डी सिक्स म्हणजे सहा थर रचले होते. या वेळी दहीहंडीपूर्वी होणाऱ्या प्रो गोविंदा स्पर्धेसाठीदेखील त्यांनी कसून सराव केला आहे. दादर येथील विजय बजरंग क्रीडा मंडळ हे नावाजलेले गोविंदा पथक असून, त्यांचे पुरुष आणि महिला अशी दोन पथके आहेत. शिस्तबद्ध पद्धतीने एक्क्यांचा थर लावण्याचा सरावदेखील सुरू करण्यात आला आहे. पुरुषांचे चार एक्के तर महिलांचे तीन एक्के लावण्यासाठी सरावादरम्यान बॅलन्सिंग, स्कॉट शारीरिक व्यायाम प्रकार करण्यात येत असल्याचे विजय बजरंग गोविंदा पथकाचे प्रशिक्षक अजय कुसुम यांनी सांगितले.
वरळीच्या अमर संदेश गोविंदा पथकानेदेखील चार एक्क्यांचा सराव सुरू केला असून, यंदा त्यांचा आठ थर लावण्याचा मानस असल्याचे पथकाचे प्रशिक्षक किशोर पांचाळ आणि विनायक पाटील यांनी सांगितले. प्रभादेवी येथील प्रगती क्रीडा मंडळ, जय ब्राह्मणदेव, जे. के स्पोर्टस क्लब या गोविंदा पथकांनीदेखील सात थरांचा कसून सराव केला आहे.