गृहनिर्माण सोसायट्यांमध्ये चोऱ्यांचे प्रमाण वाढले
महिला मंडळाकडून सिडकोकडे लेखी मागणी
खारघर, ता. २ (बातमीदार) ः तळोजा फेज दोनमधील केदार गृहनिर्माण सोसायटीत चोऱ्यांच्या घटनांमध्ये सध्या मोठी वाढ झाली आहे. यामागे सोसायटीच्या चारही बाजूंनी असलेल्या सुरक्षाभिंतीची कमी उंची कारणीभूत असल्याचे बोलले जात आहे. या परिसरात अंधार आणि झाडाझुडपांचा वेढा असल्याने चोरट्यांना सहज प्रवेश मिळतो आहे.
सीसीटीव्ही फुटेजमध्ये काही चोरटे रात्रीच्या वेळी सोसायटीच्या आवारात घुसून दुचाकींमधून पेट्रोल चोरणे, मुलांच्या सायकली, खेळणी, पाईप्स चोरणे यासारख्या घटना घडवत असल्याचे दिसून आले आहे. या चोऱ्यांमुळे नागरिकांमध्ये भीतीचे वातावरण निर्माण झाले असून, विशेषतः महिला, लहान मुले व ज्येष्ठ नागरिक यांची सुरक्षा धोक्यात आली आहे. या सोसायटीत सिडकोने एकूण १९ इमारती उभारल्या असून सुमारे हजारहून अधिक कुटुंबे वास्तव्यास आहेत. या परिसराजवळच दिवा-पनवेल रेल्वेमार्ग व पेंधर उड्डाणपूल असल्यामुळे वाहतूकही मोठ्या प्रमाणात असते. मात्र, अंधारामुळे रस्ते आणि सोसायटीचे परिसर निर्जन होतात, याचा फायदा चोरटे घेत आहेत. या घटनेनंतर केदार महिला मंडळाच्या वतीने सिडको व उपमुख्यमंत्री देवेंद्र फडणवीस यांच्याकडे पत्र पाठवून संरक्षण भिंतीची उंची किमान आठ फूट करावी आणि त्यावर संरक्षणासाठी जाळी बसवावी, अशी मागणी करण्यात आली आहे.