बीएलओ, पर्यवेक्षकांच्या मानधनात वाढ
केंद्रीय निवडणूक आयोगाचा निर्णय
सकाळ वृत्तसेवा
मुंबई, ता. २ : निवडणूक प्रक्रियेतील महत्त्वाचा घटक असलेल्या मतदान केंद्रस्तरीय अधिकाऱ्याचे (बीएलओ) वार्षिक मानधन दुप्पट करण्याचा निर्णय केंद्रीय निवडणूक आयोगाने घेतला आहे. त्यामुळे त्यांना आता वार्षिक १२ हजार एवढे मानधन मिळणार आहे. त्याचबरोबर बीएलओ पर्यवेक्षकांचे मानधन वाढवण्याचा निर्णय घेतला आहे. याशिवाय मतदार नोंदणी अधिकारी (ईआरओ) आणि सहाय्यक मतदार नोंदणी अधिकारी (एईआरएओ) यांना प्रथमच मानधन देण्यात येणार आहे.
अचूक आणि पारदर्शक मतदार यादी ही लोकशाहीसाठी भक्कम आधार असून, निवडणूक आयोगाने मतदार यादी तयार करण्यासाठी आणि तिच्या पुनरावलोकनासाठी मेहनत घेणाऱ्या अधिकाऱ्यांच्या मानधानात वाढ करून त्यांचा सन्मान केला आहे. निवडणूक आयोगाच्या निर्णयानुसार बीएलओचे २०१५ पासूनचे मानधन ६ हजार रुपयांवरून १२ हजार रुपये केले आहे. तर मतदार यादी पुनरावलोकनासाठी बीएलओ प्रोत्साहन रक्कम एक रुपयांवरून दोन रुपये करण्यात आली आहे. त्याचप्रमाणे बीएलओ पर्यवेक्षकांना १२ हजार रुपयांवरून १८ हजार रुपये दिले जाणार आहेत. तसेच एईआरओ यांना प्रथमच २५ हजार रुपये आणि ईआरओला ३० हजार रुपये मानधन देण्यात येईल. त्यामुळे निवडणूक आयोगाचे काम आणखी अचूक आणि वेगाने होऊ शकणार आहे.