धारावीकरांना धारावीतच घरे द्या!
स्थलांतर करण्यास काँग्रेसचा विरोध

सकाळ वृत्तसेवा
मुंबई, ता. २ : धारावी पुनर्वसन प्रकल्पाच्या नावाखाली भाजप सरकार धारावीकरांना विस्थापित करीत आहे. धारावीकरांना मुलुंड, डम्पिंग ग्राउंड, मिठागरे या ठिकाणी घरे देण्याचा सरकारचा प्रयत्न आहे. धारावीत अदाणींचे टॉवर उभे करून स्थानिकांना दुसरीकडे पाठवण्याचा भाजप सरकारचा डाव आहे; पण धारावीकरांना धारावीतच घरे दिली पाहिजेत. मुलुंड अथवा इतर कोणत्याही जागी धारावीतील एकही कुटुंब स्थलांतर करणार नाही, असे शुक्रवारी (ता. १) मुंबई काँग्रेस अध्यक्ष खासदार वर्षा गायकवाड यांनी बजावले आहे.
धारावीतील लाखो लोकांना मुलुंडमध्ये घरे देण्याचा भाजप सरकारचा प्रयत्न आहे. त्याला मुलुंडकरांचाही विरोध आहे. यासाठी काँग्रेसचे प्रवक्ते राकेश शेट्टी व त्यांच्या सहकाऱ्यांनी शुक्रवारी मुलुंड स्थानक येथे एक दिवसाचे लाक्षणिक उपोषण केले होते. खासदार वर्षा गायकवाड यांच्या उपस्थितीत त्यांनी हे उपोषण मागे घेतले. या वेळी खासदार वर्षा गायकवाड म्हणाल्या, की भाजपचे सरकार अदाणींसाठी सर्व नियम डावलून मुंबईतील महत्त्वाच्या व मोक्याच्या जमिनी शून्य भावात देत आहे. कुर्ल्याची मदर डेअरी, मिठागरे, मुलुंड, देवनार डम्पिंग ग्राउंड, वांद्रे येथील जमिनी दिल्या आहेत. या भूमाफियांसाठी भाजपचे सरकार पायघड्या घालत आहेत, अदाणींसाठी दिल्लीतून पंतप्रधान नरेंद्र मोदी मुख्यमंत्री फडणवीस यांना फोन करतात व फडणवीस लगेच ते ऐकतात. या भूमाफियांची जमिनीची भूक काही संपत नाही, असा आरोप गायकवाड यांनी केला. या वेळी आमदार ज्योती गायकवाड, रमेश कोरेगावकर, राजोल पाटील, सुरेशचंद्र राजहंस आदी उपस्थित होते.